DILI, 26 Juñu 2026 (TATOLI) – Parlamentu Nasionál (PN) realiza, ohin, sesaun solene hodi presta omenajen ikus ba maktoban Francisco Guterres “Lú Olo”.
Tuir giaun, iha tuku 11h55 kaixaun eis-Prezidente Repúblika to’o iha Parlamentu Nasionál. Kaixaun ne’e simu husi Sekretáriu-Jerál no Xefe Protokolu iha eskada varanda prinsipál Parlamentu Nasionál nian no akompaña bá Sala Plenária.
Iha oras 12h00 kanta inu nasionál, hafoin ida-ne’e dirije minutu silénsiu ne’ebé lidera husi Prezidente Parlamentu Nasionál, Maria Fernanda Lay.
Tuirmai Prezidente Parlamentu Nasionál deklara sesaun plenária nakloke no husu ba Sekretária Meza atu halo leitura votu pezár ba memória ba saudozu Francisco Guterres “Lu Olo”.
Maria Fernanda Lay sei konvida reprezentante bankada parlamentár sira atu hato’o diskursu tuir orden ne’ebé alokasaun minutu ba kada bankada sira hanesan CNRT, PD, FRETILIN, KHUNTO no PLP.
Iha enserramentu ba sesaun solene Prezidente Parlamentu Nasionál, deputadu meza sira seluk, no deputadu sira ne’ebé marka prezensa fó omenajen finál ba kaixaun Francisco Guterres “Lu Olo”.
Lembra katak Lú Olo termina ninia peregrinasaun iha mundu iha loron 21 Juñu, iha Ospitál Prince Court, Kuala Lumpur, Malázia, ho tinan 71, iha ne’ebé nia simu hela tratamentu médiku intensivu.
Nia moris iha Ossú, munisípiu Vikeke, iha loron 7 fulan-Setembru tinan 1954, nia dedika parte boot husi nia moris ba luta libertasaun nasionál, kaer responsabilidade oioin iha rezisténsia durante okupasaun indonézia. Hafoin Konis Santana nia mate iha tinan 1998, nia asume lideransa polítika rezisténsia timorense nian.
Notísia relevante: Omenajen ikus iha Kuartél Jerál F-FDTL, Lú Olo nunka trai povu nia konfiansa
Jornalista: Arminda Fonseca
Editora: Maria Auxiliadora
