DILI, 23 juñu 2020 (TATOLI)-Embaixadór Uniaun Europeia iha Timor-Leste, Philip Hewitt, hateten Governu Nova-Zelándia oferese ona osan Millaun $ 1 ba Timor-Leste durante ne’e hodi halo prevensaun ba surtu COVID-19.
Nia hato’o kestaun ne’e hafoin relata apoiu ne’e ba Primeiru-Ministru, Taur Matan Ruak, iha Palacio do Governo Dili, tersa ne’e.
“Durante ne’e Nova Zelándia apoiu osan ba Timor-Leste hamutuk millaun $ 1 hodi apoiu atividade prevensaun COVID-19 haneaan fó ba iha Ministériu Edukasaun hodi prepara fatin fase liman no fatin ijiéne ba labarik sira, apoiu mós ba iha PNTL no F-FDTL hanesan prepara fatun ijiéne,” dehan nia ba Jornalista sira.
“Ita mós ajuda ekipamentu protesaun hanesan máskara, luvas no seluk tan ba Ministériu Saúde hodi tulun kombate COVID-19 iha Timor-Leste,” tenik tan.
Aleinde ne’e, Nova Zelándia apoiu mós seguransa alimentár ba ONG ADRA iha Munisípiu Viqueque.
Iha sorumutu ne’e, parte rua diskute mós kona-ba hametin relasaun bilateral entre nasaun rua iha futuru.
Jornalista : Hortencio Sanchez
Editór : Agapito dos Santos
