VIQUEQUE, 26 juñu 2023 (TATOLI)—Anin sobu a’at barraka merkadu Ulussu iha aldeia Ulusu, suku Matahoi, postu Uatulari, munisípiu Viqueque durante tinan barak nia laran maibé to’o agora seidauk hadi’a.
“Anin sobu kalen barraka merkadu Ulussu iha tinan 2015, nune’e abitante lokál labele utiliza halo atividade negósiu tanba kondisaun merkadu la permite ba negosiante halo atividade,” Xefe suku Matahoi, António Amaral, hateten iha área merkadu Ulussu, segunda ne’e.
Ba kestaun ne’e, Autoridade lokál submete ona pedidu reabilitasaun ba Ministériu Komérsiu Indústria no Ambiente hodi halo reabilitasaun, maibé to’o agora laiha resposta ruma.
“Ha’u nafatin husu ba Governu, sebele karik hadi’a filafali merkadu ida-ne’e hodi ita-nia negosiante sira uza halo negósiu atu hetan osan sustenta vida família no selu labarik sira-nia eskola,” nia akresenta.
Notísia relevante : Negosiante iha Merkadu Viqueque preokupa sasán la folin
Iha fatin hanesan, Xefe aldeia Ulussu, Hermenelgido Freitas, haktuir, uluk bainhira barraka merkadu Ulussu ho kondisaun di’ak, negosiante sira hosi Laisoru no Baucau lori nesesidade bázika hodi fa’an.
“Depois merkadu ne’e anin sobu, negosiante sira labele halo atividade negósiu durante tinan-sia ona nune’e bainhira konsumidór sira atu sosa foos no nesesidade bázika tenke la’o dook ho distánsia kilómetru lima hafoin to’o iha merkadu Iraler nian, ha’u sente ida-ne’e hanesan difikuldade ida ba ami ne’ebé hela iha ne’e,” nia tenik.
Ho nune’e, Autoridade suku ne’e husu ba ministériu relavante mai direta hodi haree kondisaun merkadu nune’e bele hadi’a tanba tinan barak ona maibé la hadi’a.
Merkadu Ulussu ho ninia naruk metru 20×6, lokaliza iha aldeia Ulusu ho totál abitante 285 hosi uma-kain 84.
Jornalista : Vitorino Lopes da Costa
Editora : Julia Chatarina
