VIQUEQUE, 24 fevereiru 2022 (TATOLI) — Care International liu hosi Australian Humanitarian Partnership (AHP) apoia grupu ortikultura ‘Marca da Paz’ iha aldeia Fahi-Lain, suku Uma Tolu, postu Administrativu Lacluta, hasa’e rendimentu família nian hodi rekupera situasaun ekonomia família hosi impaktu surtu Covid-19.
Care International apoia materiál produsaun ortikultura ba grupu ortikultura ‘Marca da Paz’ liuhosi mekanizmu Australian Humanitarian Partnership (AHP), finansia hosi Governu Austrália.
Membru grupu ortikultura ‘Marca da Paz’, Francisco Lopez, haktuir, materiál ortikultura ne’ebé sira simu hosi Care International mak hanesan enxada lima, kanuru lima, masa regadór rua, ember boot rua, pestisida, mangeira, torneira rua, lona halo viveiru metru 50.
Nune’e mós fini sira hanesan tomate-musan, mostarda-musan, brinjela-musan, baria-musan no kangkong-musan.
“Masa regadór rua ne’e ami uza hodi rega modo, enkuantu ember boot rua ne’e ami uza hodi halo kompos cair, lona mak ami uza hodi hlo viveiru rua ho naruk metru 25.
Iha tempu udan ne’e, pesti ka ular-oan barak no fó risku ba ami-nia modo, entaun ami uza pestisida hodi rega no hamate pesti ka ular kik-oan sira-ne’e,” Lopes haktuir.
Grupu ‘Marça da Paz’ liuhosi apoia Care International, hahú halo preparasaun ba kuda modo iha fulan-dezembru 2021, no komesa kolleta iha fulan-fevereiru.
“Ami halo kolleta dala-rua ona. Kantadeiru primeiru ami hetan $10 no kantaderu segundu ami hetan $15. Ami la lori ba fa’an iha merkadu, ne’ebé bainhira modo boot ona, ami posting iha facebook no ema mai sosa modo fatin ne’e de’it,” nia katak.
Atividade ortikultura iha suku Uma Tolu, Care Internasional mós implementa projetu AHP Covid-19 response foka liubá prevensaun Covid-19 iha suku seluk iha munisipiu Viqueque, hanesan suku Luka, no Suku Uai-Mori Tula iha postu administrativu Viqueque.
Nune’e mós suku Loi Ulu no suku Afloicai iha postu administrativu Uatucarbau, suku Macadique no suku Aflocai iha postu administrativu Uatulari.
Atividade ne’e mós tama iha suku Ossu de Cima, suku Ossurua no suku Nahareka, postu administrativu Ossu, no suku rua seluk hanesan suku Uma Tolu no suku Ahic iha postu adminsitrativu Lacluta.
Atividade prinsipiál ne’ebé Care International hala’o iha suku hirak-ne’e mak hanesan distribuisaun tanki bee no sabaun ba fatin sira hanesan sede suku, postu saúde, eskola primária, kapela, merkadu lokál, postu administrativu no postu polísia.
Care International mós halao distribuisaun sabaun ba uma-kain 5.000 kompostu hosi aldeia 81 iha suku hamutuk 11. Care International distribui ai-han bázika ba uma-kain vulnerável sira hamutuk 1.100 iha suku 11 refere.
Care International mós fahe bidón konserva fini no distribui fini batar (Sele no Noi Mutin), no fini fore metan ba uma-kain hamutuk 1.100. Nunee mós halo distribuisaun ba fini hare Nakroma ba uma-kain hamutuk 1.600 iha suku neen mak hanesan Macadique, Afaloicai, Luca, Uai-Mori Tula, Ahic no Uma Tolu.
Care Inernasional distribui fini ba grupu ortikultura hosi suku 11 mak hanesan mostarda musan, sinora, kangkong-musan, brinjela-musan, no fini fore-tali.
Care International mós oferese formasaun ba grupu agrikultór ortikultura sira kona-ba instalasaun viveriu uza tanel ka plástiku tahan udan-been).
Jornalista : Filomeno Martins
Editór : Evaristo Soares Martins
