OÉ-CUSSE, 27 Janeiru 2025 (TATOLI) – Konsellu Kombatente Libertasaun Nasionál (CCLN, sigla Portugés), Rejiaun Administrativa Espesiál Oé-Cusse Ambeno (RAEOA), to’o agora seidauk simu reklamasaun no kontestasaun kona-bá lista editál ne’ebé públika husi Ministériu Asuntu Kombatente Libertasaun Nasionál (MACLN).
Totál lista editál ne’ebé aprovada husi Ministériu Asuntu Kombatente Libertasaun Nasionál (MACLN), hamutuk 3.571, kompostU husi sub-rejiaun Pante Makasar 1.704, sub-rejiaun Oésilo 833, sub-rejiaun Pássabe 357 no sub-rejiaun Nítibe 677.
Notísia relevante: MACLN solisita kombatente sira koopera ba prosesu editál
“Maibé to’o agora ami seidauk simu reklamasaun. Maske ami durante ne’e iha balun la satisfaz, maibé dezde anúnsia iha loron 15 Janeiru to’o agora ami seidauk simu reklamasaun ka konstestasaun ida husi kombatente ka veteranu sira,” Sekretériu Ezekutivu Konsellu Kombatente Libertasaun Nasionál iha Oé-Cusse, Xisto Sousa, hateten ba Jornalista sira iha kna’ar fatin, ohin.
Molok ne’e, ekipa tékniku husi MAKLN halo ona imprensaun ba fixa reklamasaun ka kontestasaun hodi prepara ba veteranu no kombatente ne’ebé la satisfáz ho lista editál ne’e atu mai foti no prenxe.
Fixa reklamasaun ne’e, nia dehan ho prazu durante loron 60 ba veteranu no kombatente sira atu halo kontestasaun bainhira la tuir tinan ne’ebé publika ona no bele halo reklamasaun ba ema seluk ne’ebe loloos la servisu maibé naran sai iha lista editál.
“Ami kontinua hein veteranu no kombatente sira atu mai prenxe fixa reklamasaun no kontenstasaun tanba nia prazu seidauk to’o”, nia afirma.
Notísia relevante:Governu taka sai ona lista validasaun kombatente libertasaun hamutuk 92.591
Jornalista: Abílio Elo Nini
Editor: Florencio Miranda Ximenes
