DILI, 22 janeiru 2024 (TATOLI) – Defeza hosi arguidu Apolinario dos Santos Defensór Públiku Marçal Masquerinhas, simu ona notifikasaun hosi Tribunál Judisiál Primeira Instánsia Dili (TJPID). Iha notifikasaun ne’e deskreve katak husu ba Defeza atu hatama rekursu hodi kontesta desizaun TJPID.
”Ha’u simu ona notifikasaun hosi Tribunál Judisiál Primeira Instánsia Dili, iha 14 janeiru 2024. Iha notifikasaun ne’e husu ha’u hanesan Defeza atu hato’o rekursu hodi kontesta desizaun Tribunál Judisiál Primeiru Instánsia nian”, Marçal Masquerinhas hateten ba jornalista sira iha TJPID, Colmera Segunda, ohin.
Nia dehan, desizaun TJPID hatún ona sentensa ba arguidu Apolinario dos Sannto katak hetan pena efitivu tinan haat kadeia.
“Tanba ne’e ha’u Desfeza sei la taka matan ba ha’u-nia kliente no ha’u sei hatama ha’u-nia rekursu iha tempu badak hodi konstesta desizaun Tribunál nian”, nia adianta.
Marçal hateten, prazu ba rekursu ne’e to’o de’it iha loron 30, tanba ne’e, iha tempu ba Defeza atu haree fila fali, konfirma fali faktu sira durante julgamentu molok submete rekursu ba Tribunál.
“Prazu ba rekursu ne’e iha loron 30 signifika rekursu ba kontestasaun desizaun Tribunál sei to’o 14 fevereiru. Tanba ne’e ha’u sei haree no konfirma fila fali ho faktu sira durante julgamentu molok ha’u submete ha’u-nia rekursu ba Tribunál”, nia konklui.
Arguidu Apolinario dos Santos Tribunál kondena pena efetivu tinan haat ba krime partisipasaun ekonómia no negósiu tanba durante julgamentu, faktu sira provadu katak arguidu komete duni krime ne’ebé Ministériu Públiku imputa iha nia akuzasaun.
Iha segunda (8/1) Juiz prosesu ne’ebé kaer kazu António Conceição ba projetu eskavasaun masin Atabae, Juiz Ivan Suritai, deside pena efetivu tinan lima ba arguidu Eis Ministru MCI António da Conceição ba krime partisipasaun ekonómia no negósiu tanba durante julgamentu faktu sira provadu katak arguidu komete duni krime ne’ebé Ministériu Públiku imputa iha nia akuzasaun.
Notísia relevante : Tribunál notifika ona Defeza Kalohan, fevereiru submete ona rekursu
Arguidu Domingos Goveia nudar nain ba empreza Hugo Amor Unipessoál Lda ne’ebé hetan fi’ar hosi Ministru Komérsiu Indústria ba projetu eskavasaun masin fatuk iha Atabae, Tribunál deside hodi absolve arguidu hosi krime administrasaun danoza no aplika pena indeminizasaun ho valór osan $17.000. Tanba konsidera arguidu nia hahalok ne’e hamosu hosi prejuizu ba Estadu ho valór kuantia $17.000.
Notísia relevante : Submisaun rekursu Tribunál seidauk notifika Defeza arguidu Kalohan no Apolinário
Pozisaun Defeza Apolinario no Kalohan ba pena efetivu ne’ebé atribui hosi Tribunál
Jornalista: Natalino Costa
Editór : Zezito Silva
