DILI, 19 janeiru 2024 (TATOLI) – Defeza Arguidu António Conceição Advogadu Privadu Pedro Camões, hateten Tribunál Judisiál Primeiru Instánsia Dili (TJPID) notifika ona Defeza António Conceição hodi husu atu submete rekursu hodi kontesta desizaun TJPID nian.
“Ha’u simu ona notifikasaun hosi Tribunál iha 15 janeiru foin daudaun ne’e no iha notifikasaun ne’e husu parte Defeza atu hato’o rekursu hodi kontesta desizaun Tribunál Judisiál Primeira Instánsia iha loron 30 nia-laran, tanba ne’e hanesan parte Defeza ha’u sei haree no halo hela levantamentu ba faktu sira no dokumentu sira atu halo rekursu ida presiza haree didi’ak. Iha inísiu fevereiru ha’u sei hatama rekursu”, Pedro Camões iha nia kna’ar fatin Timor-Plaza, sesta ne’e.
Nia esplika, arguidu António Conceição la simu desizaun ne’e tanba arguidu konsidera katak desizaun Tribunál nian konforme fali ba faktu hosi Ministériu Públiku nian ne’ebé provadu katak arguidu halo violasaun ba lei aprovizionamentu.
Nia dehan, momentu ne’ebá arguidu asume kargu hanesan Ministru Komérsiu Indústria (MCI) iha VI Governu Konstitusionál arguidu hasai duni despaixu ida ba Empreza Hugo Amor Unipessoál Lda hodi husu ba empreza ne’e atu halo eskavasaun ba masin iha Atabae, maibé tenke hein ekipa tékniku.
“Entaun momentu ne’e nia halo despaixu, ne’e iha surat tahan ida-nia laran, maibé liu de’it semana ida ha’u nia kliente hetan nomeasaun foun hodi ba lidera fali ministériu seluk, ho nune’e ha’u nia kliente la viola regra aprovizionamentu ruma liga ba desizaun atu halo pagamentu”, nia afirma.
Camões hateten, kliente la viola regra aprovizionamentu ruma tanba kona-ba desizaun atu halo kontratu ba empreza no la halo pagamentu ba empreza inklui arguidu la administra ona iha Ministru Komérsiu Indústria tanba servisu ne’e arguidu António entrega ona ba ema seluk.
“Ho nune’e mak ha’u nia kliente la konkorda ho desizaun Tribunál nian ne’e no konsidera katak desizaun ne’e la justu”, nia dehan
“Ha’u hanesan Defeza entende ida-ne’e katak ha’u la konkorda ho desizaun Tribunál nian ne’e no desizaun ida todan”, nia adianta.
Tanba ne’e, hanesan Defeza hosi arguidu António haruka ona karta ida ba Tribunál hodi dirije ba Juiz Titulár ne’ebé kaer prosesu kazu António. Iha karta ne’e Defeza husu Juiz haree fali faktu sira durante iha julgamentu.
“Ha’u mós haruka ona karta ba Juiz Titulár ne’ebé kaer prosesu kazu António nian no husu Juiz haree fali faktu sira durante iha julgamentu tanba faktu sira-ne’e presiza atu haree”, Pedro hateten.
Notísia relevante : Tribunál aplika pena efetivu tinan lima ba António da Conceição
Pozisaun Defeza Apolinario no Kalohan ba pena efetivu ne’ebé atribui hosi Tribunál
Submisaun rekursu Tribunál seidauk notifika Defeza arguidu Kalohan no Apolinário
Jornalista: Natalino Costa
Editór : Zezito Silva
