DILI, 27 fevereiru 2024 (TATOLI)—Deputada Partidu Demokrátiku (PD) iha Parlamentu Nasionál (PN), Sancha Tilman, apresia IX Governu Konstituisionál liuhusi Ministériu Edukasaun (ME) konsege rezolve profesór kontratadu hamutuk 4000-resin tama ingresu sai profesór permanente.
Notísia Relevante: PN apresia ME rezolve profesór kontratadu 4000-resin ba permanente
“Kongratula IX Governu liuhosi Ministériu Edukasaun nia serbisu hosi Ministra Dulce de Jesus Soares, ho nia ekipa konsege ultrapasa rezolve profesór kontratadu 4000-resin liuhosi ingresu espesiál, ne’ebé hala’o tomada pose fazeadamente insía iha Dili no munisípiu sira seluk,” Deputada PD, Sancha Tilman hato’o liuhuoi reuniaun plenária PN, tersa ne’e.
Kondisaun ne’e solusiona problema ne’ebé manorin ka profesór kontratadu sira durante tinan barak nian laran hasoru ne’ebé ho pasiénsia dedika aan tomak hodi hanorin estudante sira.
“Fesilita profesór no fesilita serbisu lideransa Ministra Dulce de Jesus, ho pasiensia solusiona problema manorin kontratadu sira,” nia dehan.
Deputada PD, Rozenha Martins, nafatin husu Governu liuhosi Ministériu Edukasaun (ME) toma atensaun ou realiza delijénsia nesesáriu ho objetivu promove kualidade edukasaun foku ensinu báziku to’o sekundáriu jerál no tékniku vokasionál.
Ko’alia kona-ba kualidade edukasaun, nia dehan, iha pontu importante hanesan rekursu umanu no iha aspetu ne’e ko’alia kona-ba profesór, rekursu material, fasilidade no infraestrutura, kurríkulu no avaliasaun.
Informasaun ne’ebé iha tuir ME determina rezolve fazeadamente problema falta profesór ho kualifikasaun ezije tuir lei, liuhosi ingresu espesiál ba karreira kada profesór no bolsa kandidatu no rekrutamentu ba bolsa ne’e iha hela andamentu.
Ministériu Edukasaun nia dezempeña hodi rezolve kestaun falta profesór liuhosi transferénsia profesór iha estabelesimentu ensinu ba estabelesimentu seluk ne’ebé menus profesór.
“Hakarak lori Partidu Demokrátiku felisita Ministériu Edukasaun no votu konfiansa forsa kontinua. No relasiona ho prosesu rekrutamentu bolsa kandidatu nafatin husu mós atu Ministériu Edukasaun hala’o ho transparante no aposta kualidade ajusta ba realidade ita-nia nasaun,” mia hateten.
Deputadu CNRT, Gabriel Soares, dehan IX Governu Konstitusionál liuhosi ME konsege rezolve profesór kontratadu 4000-resin ho destinu própriu kareira permanente no agora ME komesa fó pose ba profesór kontratadu ne’ebé sai permanente ne’ebé hala’o ona iha RAEOA Ermera, no agora kontinua hela ba munisípiu seluk.
Aliénde ne’e, agora ministériu iha mós rekrutamentu bolsa kandidatu ne’ebé ema hotu akompaña.
Deputada CNRT, Aliança da Conceição, mós felisita IX Governu Konstitusionál liuhosi Ministériu Edukasaun ho lidera Minstra, Dulce de Jesus, ne’ebé rezolvee profesór kontratadu na’in 4000-resin ba permanente.
Deputadu KHUNTO, Luis Roberto, husu ba ME atu konsidera manorin kontratadu sira-ne’ebé iha ona esperiénsia tinan barak nu’udar manorin no kontribui sira nia tempu naruk hodi servi iha setór edukasaun atu transforma ba permanente.
Notísia Relevante: Komisaun G bolu Ministra Edukasaun klarifika Estatutu Karreira Edukadór
Jornalista : Nelson de Sousa
Editór :Cancio Ximenes
