BAUCAU, 06 fevereiru 2023 (TATOLI) – Diresaun territoriál florestál no plantasaun industriál munisípiu Baucau halo apreensaun ba mákina tesi ai tanba laiha karta autorizasaun.
Koordenadór no xefe departamentu reprezentasaun territoriál florestál no plantasaun industriál Baucau, Pasqual Afonso Belo, esplika, guarda floresta bainhira patrullamentu ba baze hodi hetan direitamente komunidade utiliza mákina tesi ai ilegál iha área rua hanesan suku Bucoli, postu Baucau vila no suku Alaua kraik, postu Baguia iha inísiu tinan 2023.
“Ita halo intervensaun kedas, halo apreensaun ba mákina no agora daudaun iha edifísiu,” Koordenadór no xefe departamentu reprezentasaun territoriál florestál no plantasaun industriál Baucau hateten iha Vila Nova, segunda ne’e.
Diresaun floretál antes ne’e sosializa ona kona-ba prosesu tesi ai tanba ne’e autoridade suku no postu administrativu mak fó-sai karta rekomendasaun, enkuantu karta autorizasaun hosi diresaun florestal Baucau.
Nune’e, knaar no funsaun guarda florestál mak halo intervensaun ba komunidade ne’ebé tesi ai bainhira laiha karta autorizasaun hosi diresaun florestál.
Kazu iha Bucoli, postu Baucau vila akontese iha loron-31 fulan-janeiru inísiu tinan-2023 ne’ebé komunidade tesi iha natar laran ho tipu ai-maras, ai-kasi no ai-hanek hamutuk neen ne’ebé konsideradu liu ona kuantidade.
Enkuantu iha suku Alaua, postu administrativu Baguia akontese iha loron-05 fulan-fevereiru ne’ebé parte Igreja tesi ai-matan dukur hodi utiliza ba konstrusaun eskola nune’e parte guarda florestál direitamente hapara tanba laiha karta autorizasaun hosi parte diresaun.
“Ami hein sira-nia prezensa atu klarifika objetivu tesi ai refere, kuandu iha kazu grave liu ita aprezenta ba Ministériu Públiku atu prosesa ba tribunál maibé kaundu lae ita sei fó sansaun administrativu ba sira,” Pasqual Belo akresenta.
Diresaun florestál rejista komunidade ne’ebé utiliza mákina tesi ai hamutuk 800 nune’e presiza tenke halo jestaun hodi antesipa atividade ilegál no prevene mosu dezastre naturál hanesan rai-halai, bee matan maran, rai manas no inundasaun iha munisípiu Baucau.
Jornalista : Natalino Belo
Editór : Evaristo Saores Martins
