BOBONARU,19 Maiu 2026 (TATOLI)-Eskola Báziku Filiál (EBF) Halekou, iha suku Ritabou, postu dministrativu Maliana, munisípiu Bobonaru, falta profesór ba atu hanorin alunu sira iha primeiru no segundu siklu.
Koordenadór EBF Halekou, Lourenço da Costa Barros, dehan eskola ne’e iha de’it manorin na’in-haat, ne’ebé seidauk sufisiente atu hanorin estudante sira.
Notísia relevante: Edukasaun Bobonaru hetan kolokasaun profesór bolsa kandidatu 104
“Ami-nia difikuldades mak profesór. Até a data ami iha profesór na’in-haat de’it, tanba ne’e rekomenda ba Ministeriu Edukasaun atu koloka tan manorin na’in-rua mai iha ne’e”, nia dehan.
Tanba falta manorin maka eskola ne’e aplika hela ensinu no apredizajen multi klase. “Primeiru anu ho segundu anu ne’e tama hamutuk iha klase ida mak hanorin. Depois mai iha terseiru no kuartu anu mós hamutuk iha klase ida. Iha kintu no sestu anu mak profesór idaidak. Maski hanorin multi klase, ami garante hanorin ho di’ak, maibé filafali ba estudante balun la aproveita, entaun susar”, katak.
Ba kestaun ne’e, Diretór Servisu Munisipál Edukasaun, Autoridade Munisípiu Bobonaru, Miguel Freitas, dehan edukasaun munisipál rejista problema ne’e no seidauk bele fó resposta tanba kolokasaun profesór bolsa kandidatu mós la sufisiente atu kobre hotu EBF hotu-hotu.
“Problema ne’e liga ho profesór reformadu 100-resin, ne’e mak ami atu rekupera profesór sira ne’e sei hein realizasaun teste bolsa kandidatu husi Ministériu Edukasaun, nune’e bele kompleta iha tempu ikus mai”, nia dehan.
Kona-ba mobiliáriu eskolár no seluk tan inklui bee-moos iha EBF ne’e sufisiente.
Tuir dadus tinan letivu 2026, totál estudante husi primeiru to’o sestu anu iha EBF Halekou hamutuk 130.
Notísia relevante: Profesór foun 91 aprezenta-aan ba Autoridade Bobonaro
Jornalista: Sergio da Cruz
Editora: Maria Auxiliadora
