DILI, 13 dezembru 2023 (TATOLI)— Maske Governu Timor-Leste selebra akordu ho empreza importadór ALFA Dili Unipesoál, Lda no Lisun Importação no Exportação Lda, iha fulan outubru hodi implementa intervensaun temporária ba estabilizasaun folin foos iha merkadu, maibé to’o agora seidauk implementa tanba estoke foos iha armazein mamuk.
“Semana oin. foos iha ona Timor no ami bele halo ona intervensaun ka implementasaun ba subsídiu foos ne’e. Ami nia foos tonelada 2.000 mak sei to’o uluk no segunda etapa tonelada 5.000 mak sei to’o tan mai”, hatete Jerente Empreza Importadór Alfa Dili Unipesoal Lda, Paulo Sarmento ba Agência TATOLI iha kna’ar fatin-Dili.
Notísia relevante:Empreza Perissos fa’an ona foos marka “Amor de familia” ho folin $12.50
Tuir akordu, nia dehan empreza sei halo intervensaun ka implementa ba subsídiu foos husi Governu mak ho marka Golden Star 25 kg ne’ebé sei fa’an ho presu $12 kada saka.
Tuir nota entendimentu ne’ebé ami asina mak ami sei halo intervesaun ho foos tonelada 7.500 ho kada saka fa’an iha merkadu ho presu $12”, nia afirma.
“Nune’e bainhira foos to’o iha armazein ami sei informa ba Governu hodi bele hala’o lansamentu ofisiál ida hodi bele halo intervensaun kedas ba merkadu”, nia promote.
Iha fatin ketak, Reprezentante Empreza importadór Lisun Unip,Lda, Ana Rela, informa seiudak implementa foos subsídiu tanba foos sei to’o iha too iha loron 19 dezembru ne’e, nune’e hafoin to’o iha armazein bele halo intervensaun iha merkadu.
“Ami demora oituan tanba estoke foos iha armazein laiha ka mamuk, nune’e ami halo halo akordu ida ho empreza Indianu hodi halo importasaun, maibé kansela hotu. Nune’e ami halo negosiasaun foun ida ho empreza Pakistaun atu importa foos iha loron 19 mai iha Timor-Leste.
Foos ne’ebé empreza importadór deside mak ho tipu foos furak ne’ebé ho kilograma 25 ne’ebé kada saka sei faan ho folin $12.
Daudaun ne’e, Empreza importadór Perissos Victoria,Lda, mak implementa ona foos subsídiu governu ho marka “Amor da Familia” saka kilograma 20 ho folin $10 no saka kilograma 25 ho presu $12,50.
Entertantu, Governu halo akordu ne’e ho objetivu mak atu asegura presu foos importadu, ne’ebé fa’an iha armazein empreza nasionál nian sira ne’ebé fa’an kuantidade boot, hodi fiksa ho montante másimu $12 ba kada saku ka parsela 25Kg, atu permite fa’an-rahun foos ho folin másimu 0,50 kada kilograma.
Hodi kumpre limite presu másimu ida-ne’e, empreza nasionál sira ne’ebé fa’an foos ho kuantidade boot ka operadór ekonómiku nasionál sira ne’ebé importa foos ho kuantidade boot sei simu subsídiu ho valór dolar amerikanu US$ 5 kada saku ka parsela 25 Kg, ne’ebé korresponde ho sentavu 20 ba kada kilograma foos nian.
Atu hetan subsídiu, empreza tenke submete pedidu pagamentu, akompaña ho kópia ne’ebé hetan autentikasaun hosi Autoridade Aduaneira, ne’ebé komprova katak importasaun produtu tuir espesifikasaun no períodu ne’ebé define ona iha Dekretu-Lei n. 76/2023, loron 29 fulan-setembru, ne’ebé estabelese medida ida-ne’e.
Empreza lima ne’ebé formaliza ona akordu ho Governu maka, Perissos Victoria Lda, Loja Creative Furak Lda, Lisun Importação no Exportação Lda, Jusibel Unipessoal Lda no Alfa Dili Unipessoal Lda.
Notísia relevante: Governu koordena ho empreza importadór normaliza presu foos
Jornalista : Jesuina Xavier
Editór : Florencio Miranda Ximenes
