BAUKAU, 07 Abríl 2026 (TATOLI) – Folin transporte públiku diresaun husi Afasa, postu administrativu Kelikai Antigu ba Baukau Vila hahú sa’e impaktu husi folin mina ne’ebé sirkula iha munisípiu Baukau.
Xefe suku Afasa, Joaquim Fernandes Ximenes, esplika, presu transporte públiku husi Afasa ba Baukau Vila aumenta no atuál kada pasajeiru selu $3.50 bainhira kompara ho antes ne’ebé selu $2.
“Ida-ne’e difikulta tebes ba komunidade tanba movimentasaun husi postu Kelikai Antigu distánsia dook kilómetru 32,” Joaquim Ximenes hateten iha Salaun Apuramentu Administrasaun Munisipál Baukau, Tersa ne’e.
Alende ne’e, fatór kondisaun udan no kondisaun klima afeta mós ba kondisaun estrada diresaun Samaguia ba Afasa estragu nune’e difikulta movimentasaun transporte públiku no ambulánsia bainhira komunidade hasoru situasaun emerjénsia.
Líder komunitáriu ne’e relata komunidade parte Kelikai Antigu hanesan suku Afasa obrigadu tenke hasai osan hamutuk $7, enkuantu Gurusa $8 hodi selu transporte públiku ba-mai hodi fa’an produtu iha merkadu, Baukau Vila.
“Impaktu tebes liuliu ba motorista sira no komunidade tanba folin mina hahú sa’e,” Joaquim Ximenes akresenta.
Entretantu, husi observasaun Ajénsia TATOLI iha terrenu ba sentru ambastamentu hamutuk 11 iha munisípiu Baukau folin mina gazolina kada litru hahú husi $1.40 sentavu to’o $1.50, enkuantu gazoel hahú husi $1.60 to’o $1.65 kada litru.
Jornalista: Natalino Belo
Editór: Evaristo Soares Martins
