DILI, 21 Jullu 2025 (TATOLI) – Atleta sira husi modalidade Karaté-do Timor-Leste prepara ona atu reprezenta nasaun iha Jogu Desportivu CPLP, ne’ebé sei hala’o entre loron 24 no 25 Jullu ne’e.
Timor-Leste iha atleta na’in-haat, kompostu husi feto rua no mane rua, atu kompete iha eventu ne’e, iha kategoria pezu kilógrama (kg) -48, -53 kg, -55 kg no seluk iha -60 kg.
Sekretáriu-Jerál Federasaun Karate-do Timor-Leste (FKTL), António de Araújo, hateten preparasaun ba selesaun nasionál iha aspetu tékniku, fíziku no mentál di’ak ona hodi hein tun ba batalla no garante sei lori rezultadu di’ak.
“Preparasaun tama ona husi fulan-Janeiru to’o agora, liuhusi selesaun rigoroza. Agora preparasaun 97%, hela 3% atu tun ba kompetisaun. Nune’e ita sente preparadu no otimista bele halakon sira”, nia hateten ba Tatoli, ohin.
Atleta Melícia Auxilia Gusmão, deklara sente orgullu tebes tanba bele reprezenta nasaun iha modalidade Karaté-do iha eventu internasionál hanesan CPLP.
“Orgullu bele hetan oportunidade atu partisipa jogu hodi lori nasaun nia naran. Tenke manán, maibé jogu mak determina, manán ka la’e”, nia dehan ho fiar an.
Melícia esplika katak preparasaun ba jogu ne’e hahú kedas husi Janeiru no kontinua intensifika treinu, mezmu hela loron rua hakat ba jogu. Nia subliña xave ba susesu mak treinu no hatudu kompromisu boot.
Melicia, tinan 16, husi munisípiu Baukau, hahú envolve iha Karaté-do husi tinan 2018, iha Dili. Nia hakarak kontinua dezenvolve ninia talentu, ho organizasaun tempu entre eskola no treinu. “Dezafiu ne’ebé durante hasoru mak fahe tempu ba eskola no treinu, maibé sempre halo jestaun di’ak atu labele husik leet de’it tempu, tanba tempu nu’udar osan-mean”, dehan.
Nia la’ós atleta baibain. Iha esperiénsia kompetisaun barak iha nivel masionál iha kategoria júnior (ba labarik), no sempre hetan klasifikasaun di’ak. Iha 2023, Melícia partisipa kompetisaun Karaté-do iha Belu-Atambua, Indonézia, no hetan terseiru lugar iha kategoria júnior, simu prémiu sertifikadu.
Mehi sai atelta ne’ebé semo aas liután, nia selesionadu liuhusi prosesu rigorozu atu reprezenta Timor-Leste iha jogu internasionál CPLP ba tinan ne’e.
Notísia relevante: https://tatoli.tl/2025/07/18/atleta-nain-20-husi-nasaun-cplp-mak-kompete-iha-modalidade-karate-do/
Jornalista: Nelson de Sousa
Editora: Maria Auxiliadora
