DILI, 11 Maiu 2026 (TATOLI)—Membru Polísia Nasionál Timor-Leste (PNTL) Munisípiu Lautein konsege detein ona suspeitu na’in-10 relasiona ho kazu omesídiu ne’ebé mak akontese iha Aldeia Poros, Suku Mehara Postu Administrativu Tutuala foin lalais ne’e.
“Polísia halo ona detensaun ba suspeitu na’in-10 pesoas inklui oknum pesoál F-FDTL (FALINTIL-Forsa Defeza Timor-Leste) ho inisial ODS. Kazu ne’e agora iha prosesu nia laran no aban Tersa dia 12 Maiu 2026 sei apresenta ba Tribunál Distrital Baukau hodi remete ba primeiru interrogatóriu,” Komandante PNTL Munisípiu Lautein, Superintendente Xefe Polísia António do Rego, informa ba Ajénsia TATOLI via telefónika, Segunda ne’e.
Notísia relevante : PNTL detein membru F-FDTL ida suspeitadu ba kazu omisídiu iha Poros
Kazu omesídiu ne’e akontese iha loron 10 Maiu 2026 maizumenus tuku 01.15 madugada.
Nia konta katak, molok kazu ne’e akontese, iha uluk serimónia koremetan no serimónia kultura barlake nian iha fatin rua iha Aldeia Poros, Suku Mehara postu Tutuala Munisipiu Lautein iha loron 09 Maio 2026.
“Festa koremetan ne’e fila-an ba konfrontu entre grupu rua, husi festa na’in no ema sira ne’ebé mai husi li’ur. Iha akontesimentu ne’e rezulta ema ida kanek todan no PNTL fornese asisténsia hodi lori vítima bá Ospitál Lospalos maibé la konsegue salva nia vida no ikus mai mate iha ospitál,” António do Rego, relata.
Jornalista : Natalino Costa
Editora : Julia Chatarina
