VIQUEQUE, 24 agostu 2023 (TATOLI)–Fundasaun K’nua Haberan Komunidade (KHK) no Asia Justice and Ricghts (AJAR), liuhosi programa spotlight apoia fini manu rade hamutuk 50, kalen 200 resin halo lutu, inklui rede tolu haleu ba grupu Mane ba Pás iha aldeia Maroman, suku Uma-ki’ik, postu Viqueque Vila, munisípiu Viqueque.
Diretór Fundasaun KHK, Agusto Pinto, hateten, distribuisaun fini ne’e nu’udar atividade kontinuasaun hosi projetu pilotu iha sentru atendimentu ba feto no labarik iha suku Uma-ki’ik, ho objetivu atu konsensializa foin-sae redús violénsia iha família no aumenta rendimentu ekonomia família.
Notísia relevante : KHK no CRS apoia ekipamentu ba grupu ortikultura Uma-Uain Kraik Viqueque
“Ba oin ami sei kontinua asisténsia ba grupu Mane ba Pás hodi kuidadu manu rade no prepara hahán sira,” Jerente Fundasaun KHK informa iha suku Uma-ki’ik, kinta ne’e.
Ho apoiu ne’e, fundasaun hamutuk ho parseiru nafatin enkoraja grupu atu kuidadu ho fini hodi sai barak nune’e bele fornese ba grupu seluk ne’ebé presiza.
Iha fatin hanesan, Sekretáriu Administradór munisípiu Viqueque, Teotónio Sarmento da Silva, agradese ba KHK no parseiru ne’ebé fó ona apoia no husu atu alarga inisiativa ne’e hodi Governu bele apoia grupu sira hodi hadi’a ekonomia.
“Ha’u sujere ba grupu sira hodi kuida manu rade ida-ne’e hodi habelar, nune’e tempu ruma manu sai barak liután. Tanba manu rade ohin loron ita haree hahú menus nune’e tempu agora nu’udar oportunidade di’ak habelar iha munisípiu Viqueque,” nia akresenta.
Nune’e mós, Koordenadór grupu Mane ba Pás, Luís de Jesus Pinto, promete katak grupu sei tau-matan ho di’ak.
“Ami agradese tebes ba apoia ida-ne’e no ami komtinua hakarak habelar manu rade ida-ne’e atu reforsa ami-nia ekonomia uma-laran,” nia subliña.
Grupu Mane ba Pás harii iha tinan 2023 ho membru na’in-12, kompostu hosi feto neen no mane neen.
Iha biban hanesan, ekipa hosi KHK no AJAR oferese formasaun ba membru grupu hodi halo jestaun ba manu rade.
Jornalista : Vitorino Lopes da Costa
Editora : Julia Chatarina
