VIQUEQUE, 15 agostu 2023 (TATOLI)—Organizasaun lokál Naun Governamentál Fundasaun K’nua Haberan Komunidade (KHK) koopera ho Catholic Relief Services (CRS) apoia ekipamentu agrikultura ba grupu ortikultura haat iha aldeia Cailoi, suku Uma-Uain Kraik, postu Viqueque Vila, munisípiu Viqueque.
Diretór KHK, Agosto Pinto, hateten, distribuisaun ne’e tanba haree katak grupu hirak ne’e ho inisiativa hakarak kontribui ba dezenvolvimentu ekonomia liuhosi atividade ortikultura.
“Nune’e ami mai apoia ekipamentu agrikultura ba grupu hodi reforsa sira-nia atividade no hasa’e produsaun agríkola. Ha’u husu ba grupu sira ne’e labele haree ba kuantidade ne’ebé ami fó, maibé oinsá maka bele tulun imi no suporta imi-nia atividade ortikultura,” Jerente fundasaun hateten iha aldeia Cailoi, suku Uma-Uain Kraik, tersa ne’e.
Ekipamentu ne’ebé hetan kompostu hosi jeradór ba kada grupu hetan ida, potri 25 kuda modo oan, plástiku taka modo, mangera no profil litru 1.000 ba grupu haat ho membru na’in-70 hanesan grupu Hakiak Osan, Haburas Osan, Hadomi no Tanutetu.
Notísia relevante : KHK planeia reforsa grupu kiik iha Viqueque sai kooperativa
Organizasaun KHK no CRS agradese ba inan aman ne’ebé ho inisiativa hakarak hadi’a sira-nia ekonomia, nune’e liuhosi apoia sira-ne’e bele motiva liután grupu sira halo atividade.
“Ha’u husu ba grupu sira atu uza ekipamentu sira ne’e ho di’ak ba atividade ortikultura tanba ekipamentu sira-ne’e ami hetan liuhosi prosesu naruk. Tanba ne’e ha’u prefre uza ba agrikultura, labele uza ba atividade privada sira,” nia akresenta.
Organizasaun rua sei buka dalan ba merkadu atu grupu sira-nia produsaun bele asesu ba merkadu no distribui modo ba eskola sira liuhosi programa merenda eskolár.
“Ho nune’e grupu sira tenke hasa’e produsaun, depois maka buka merkadu hodi distribui ba,” nia adianta.
Iha fatin hanesan, Administradór postu Viqueque Vila, Duarte Soares Brandão, enkoraja grupu sira hodi halo produsaun produtu agríkola barak liután.
“Ho apoia sira ne’ebé imi hetan, ha’u husu tenke haboot produsaun. Apoia ne’ebé paseiru fó tenke uza aumenta produsaun tanba merkadu mós hein hela imi-nia produsaun. Se agora imi halo ektare ida, tinan oin tenke ba ektare rua ba leten,” Autoridade postu motiva grupu benefisiáriu sira.
KHK no CRS oferese apoia liuhosi projetu Hakoren ho tipu atividade tolu hanesan risku dezastre, agrikultura no rai osan.
Antes ne’e, organizasaun rua apoia uluk fini modo musan sira hanesan gangu, tomante, fore-tali, baria no brinjela.
Distribuisaun ekipamentu ne’e hosi Administradór postu Viqueque Vila, Diretór fundasaun KHK, reprezentante Servisu Agrikultura munisípiu Viqueque ba responsavél grupu haat.
Atividade ne’e partisipa hosi Autoridade no abitante lokál inklui membru grupu haat iha suku Uma-Uain Kraik.
Jornalista : Vitorino Lopes da Costa
Editora : Julia Chatarina
