DILI, 27 setembru 2023 (TATOLI) – Ministériu Edukasaun (ME) sei halo enkontru, iha novembru, ho okupante sira iha perímetru eskola nian iha Díli antes foti desizaun hodi hasai.
Diretór Nasionál Ensinu Sekundáriu Jerál, Benjamin Fernandes, hatete nia simu ona orientasaun husi Sekretáriu Estadu Edukasaun, Ensinu Sekundáriu no Eskola Téknika, Domingos Lopes Lemos, atu ko’alia ho akupante sira.
“Atividade hasoru malu ho komunidade sira ne’e sei realiza iha novembru, tanba outubru ne’e okupadu ho ezame nasionál entaun labele realiza ho lalais”, dirijente ne’e dehan iha Vila Verde, ohin.
Iha sorin seluk, Sekretáriu Estadu Domingos Lemos hatete Ministériu Edukasaun planeia ona atu halo identifikasaun ba okupante sira, nune’e bele hatama iha planu bainhira mak atu hasai sira.
“Ha’u orienta ona Diretór Ensinu Sekundáriu Jerál atu bá identifika eskola sira ne’ebé komunidade okupa hodi halo aprosimasaun ho sira atu buka solusaun ruma kona-ba pozisaun Governu ninia”, governante hatete iha Comoro.
Nia dehan polítika Ezekutivu nia klaru ona katak iha tinan lima nia laran sei garante kualidade edukasaun no asegura kondisaun di’ak iha eskola sira, nune’e bele fó biban ba estudante sira atu estuda ho hakmatek no labele kahur malu ho komunidade sira.
Tuir nia, bainhira atu hasai okupante sira tenke la’o tuir prosedimentu ne’ebé iha no labele hasai ho forsa ka duni de’it, nune’e labele hatodan fali parte seluk.
Diretór Servisu Edukasaun Munisípiu Dili, Carlito da Silva, afirma katak nia halibur ona dadus balun kona-ba eskola sira iha Dili ne’ebé iha okupante.
Eskola sira ne’e mak Sekundáriu Jerál (ESJ) 12 Novembru iha família rua, ESJ 04 Setembru Balide iha neen, 10 de Dezembru iha 14, Eskola Bázika Sentrál (EBC, sigla portugés) Sergio Vieira de Melo iha neen, EBC Fatumeta neen, EBC Akadiru-hun hitu, Eskola Pré-Eskolár Esperansa neen, Eskola Sekundária Tékniku Vokasionál (ESG) GTI Becora ida, Eskola Tékniku Vokasionál HT Becora ida, Eskola 28 Novembru haat, Eskola Bázika Filiál (EBF) Paiol lima no EBF Duque de Caxias Bemori neen.
“Husi dadus sira ne’e bele kontribui ona ba ministériu atu kontinua buka tan dadus sira, nune’e bele halo kompletu liután atubele sai referénsia hodi aselera prosesu hotu”, realsa.
Notísia relevante: Edukasaun Dili sei entrega dadus okupante eskola ba Governu foun
Jornalista: Tome Amado
Editora: Maria Auxiliadora
