DILI, 02 juñu 2023 (TATOLI) – Servisu Edukasaun Munisípiu Dili sei entrega dadus okupante iha perímetru eskola 16 ba Governu foun atu kontinua trata asuntu ne’e hodi hasai família 75 ne’ebé daudaun hela iha fatin refere.
Diretór Servisu Edukasaun Dili, Carlito da Silva, hatete Governu esforsu atu lori fali okupante sira ba sira-nia hela fatin, maibé tempu mak limitadu ona atu rezolve kestaun ne’e.
“Ami durante ne’e halo ona esforsu maka’as, liuhusi meiu oioin hodi halibur dadus kona-ba okupante sira ne’ebé hela iha eskola iha Dili laran ne’e atu reintegra sira ba komunidade, maibé esforsu ida ne’e lakonsege la’o to’o nia rohan no agora tempu ami prepara hela dadus no sei entrega ba Nonu Governu, liuhusi lideransa Ministru Edukasaun foun maka sei foti medida”, Carlito da Silva dehan ba Tatoli iha Comoro, sesta ne’e.
Nia haktuir katak dadus ne’ebé rekolla ona la’o tuir zona ne’ebé eziste maka husi Kristu Rei iha eskola hamutuk sia, Na’in-Feto tolu, Vera Cruz ida no Dom Aleixo tolu. Husi estabelesimentu eskola sira ne’e maka uma-kain 75 okupa hela durante tempu naruk no to’o ohin loron seidauk hetan de’it ninia solusaun.
Carlito da Silva relata katak depois asume tiha knaar nu’udar diretór edukasaun Dili, asuntu prinsipál ne’ebé tenke rezolve maka okupante sira. Husi esforsu ne’ebé nia halo konsege hasoru malu ho okupante sira, dirijente eskola, autoridade lokál iha zona refere no parte seguransa sira atu tau hanoin hamutuk hodi bele haree kestaun ne’e, maibé buat hotu tenke la’o tuir dalan no tenke husik hela ba Ezekutivu foun.
Nune’e nia husu ba Ministru Edukasaun foun atu nafatin tau prioridade ba asuntu refere, tanba fatin ne’ebé maka Estadu kria ba estudante sira la’ós komunidade sira maka utiliza fali. Tanba ne’e, Governu foun tenke sériu ba kestaun ne’e atu labarik sira bele hetan espasu hodi tuir prosesu aprendizajen.
Notísia relevante: Dirijente Eskola EBC Hera halo esforsu buka solusaun ba okupante sala aula
Jornalista: Tomé Amado
Editora: Maria Auxiliadora
