DILI, 24 outubru 2022 (TATOLI)—Diretór Eskola Ensinu Báziku (EBC) 30 Hera, Sancho Menezes, hateten, daudaun ne’e parte eskola koordena ho parte relevante halo esforsu buka solusaun ba uma-kain sira ne’ebé okupa sala aula rua.
“Durante ne’e ami halo esforsu maka’as atu lori fila okupante ba sira-nia hela fatin liuhosi polítika ida, maibé presiza apoiu hosi Protesaun Sivil, Administradór postu administrativu Cristo Rei inklui Autoridade lokál, maibé to’o agora laiha rezultadu. Ami halo ona karta formál ba Protesaun Sivil no Administradór Cristo Rei atu realiza enkontru iha eskola ne’e maibé sira la mai. Ami halo de’it enkontru ho xefe suku no xefe aldeia sira maibé laiha desizaun ida,” Diretór informa iha resintu eskola, segunda ne’e.
Maski nune’e, estrutura eskola sira nafatin buka dalan, nune’e molok tinan ne’e ramata bele hetan ona solusaun no eskola bele hala’o atividade ho di’ak.
Notísia relevante: MEJD enkoraja estudante esforsu-an hetan rezultadu di’ak iha ezame nasionál
Iha fatin hanesan, Ministru Edukasaun Juventude no Desportu (MEJD), Armindo Maia, hateten, uma-kain sira ne’ebé okupa sala aula eskola ne’e tanba inundasaun ne’ebé akontese iha tinan kotuk sobu sira-nia uma, tanba ne’e atu rezolve presiza desizaun entre liña ministeriál.
“To’o agora sira sei kontinua okupa sala aula rua iha Eskola EBC Hera. Ita rona katak mota sobu hotu ona sira-nia hela fatin no agora sira laiha rai ka fatin atu hela,” Ministru dehan.
Tuir Ministru, presiza desizaun hosi entidade relevante atu nune’e bele hatuur hanoin hamutuk no haree saida mak sei halo iha futuru, enkuantu eskola presiza mós fasilidade atu apoiu estudante sira.
“Desizaun atu lori sai sira hosi eskola ne’e tenke desizaun koletiva. Ita hakarak parte rua tenke hetan hotu benefísiu hosi desizaun sira atu nune’e parte eskola labele hetan todan inklui presaun ruma no iha sorin seluk komunidade hamamuk eskola ho di’ak,” nia tenik.
Jornalista : Tomé Amado
Editora : Julia Chatarina
