OÉ-CUSSE, 08 agostu 2023 (TATOLI – Diretór Rejionál Infraestrutura (DRI), Rejiaun Administrativa Espesiál Oé-Cusse Ambeno (RAEOA), Candido dos Reis Amaral, promete, molok udan monu rai komunidade sira sub-rejiaun Pássabe, Oésilo no Nítibe bele asesu ona ponte Bitopa no Noetoko hodi transporta produtu ba merkadu ho di’ak.
“Agora nia progresu to’o ona 80%, hein de’it kompañia sira finaliza servisu balu, ha’u hanoin iha tempu badak bele entrega ona ba autoridade RAEOA, tanba tuir ita-nia tarjetu antes udan monu rai, ponte rua ne’e komunidade tenke uza ona,” Candido Amaral, ba Tatoli iha Oé-Cusse, tersa ne’e.
Notísia relevante: Autoridade lokál nia esperansa ba futuru konstrusaun ponte Bitopa-Noetoko
Diretór Candido, informa, tuir parte tékniku sira ba rezultadu fiskalizasaun ne’e, sei falta servisu finaliza nian de’it, iha parte estrutura leten nian, bee-dalan, depois servisu ki’ik oan balu sira, tanba servisu fiziku hotu ona, nune’e molok udan komunidade sira bele uza ona.
“Ne’e ita garante, tanba ponte ne’e ita halo ho objetivu atu fasilita de’it komunidade sira, tanba durante tinan barak, sira hein, entaun ne’e estratéjia atu fasilita de’it komunidade sira liuliu iha tempu udan tau, ita hatene iha sub-rejiaun Pássabe, Nítibe no Oésilo rasik, sira araska tebes, tanba bainhira kuandu udan labele asesu mai vila tanba mota boot,” nia afirma.
Entretantu, kontrusaun ponte Bitopa kompañia Am-Lhichoe Unipesoál, Lda, ezekuta ho valór kontratu hamutuk U$406,945.00, orsamentu ne’e, Autoridade RAEOA aloka hosi Orsamentu Jerál Estadu (OJE) 2022.
Nune’e mós, projetu ponte Noetoko kompañia Lifau Indah Unip, Lda ho valór kontratu $ 625, 451. 54, osan ne’e Autoridade RAEOA prevee hosi Orsamentu Jerál Estadu (OJE) 2022 nian, ho durasaun servisu durante fulan neen.
Notísia relevante: Ponte Bitopa-Noetoko konstrui uza dezeña ponte antiga Oébaha no Bihala
Jornalista: Abílio Elo Nini
Editor: Evaristo Soares Martins
