BOBONARO, 26 janeiru 2024 (TATOLOI)- Volume bee-mota Bulolu kontinua sobu estraga estruturu Ponte iha área Samuaten, suku Manapa ligasaun hosi postu administrativu Cailaco ba postu administrativu Maliana villa hafoin akontese udan-boot durante ne’e.
Xefe suku Manapa, postu administrativu Cailaco, Zeferino Loco Bere, informa iha fulan dezembru tinan 2023 ne’e Institutu Justaun Ekipamentu Apoia Dezenvolvimentu Infraestrutura, Institutu Públiku (IGEADI,IP) halo ona normalizasaun ba ponte refere hodi fasilita movimentasaun transporte públiku maibé lakleur de’it aat fila-fali.
Notísia relevante: Ponte ligasaun Cailaco ba Maliana kotu
“Sira enxe deit rai-henek iha saku tau, udan mai ita haree saku balu komesa monu tuiuir ona, ita haree hosi leten no kraik ne’e estrada ne’e komesa ona monu, kuandu udan boot mai, nia sei aat liután,” nia informa ba jornalista sira iha terrenu, kinta ne’e.
Lideransa komunitária ne’e hato’o ona pedidu ba administradór postu administrativu Cailaco no enkamiña ona ba Prezidente Autoridade Munisípiu Bobonaro, maibé to’o agora seidauk iha rezultadu.
“Sira dehan buat hotu-hotu depende ba nasionál maka haruka planu, maibé ninia mekanizmu mak governu tenke halo konstrusaun iha planu orsamentu 2025 tanba ponte ida-ne’e nia durasaun tempu kleur ona,” nia tenik.
Administradór postu administrativu Cailaco, Alfredo Meta Dau, hato’o ona ba ekipa tékniku hosi PT Wiratman-JKC Konsultant bainhira halo levantamentu, presiza mos tau iha nota hodi halo rekomendasaun ba Ministériu Obra Públika atu halo manutensaun ba ponte refere.
“Sesta ne’e ami ko’alia tiha ona ho sira, ami autoridade ne’e haree aat halo pedidu ba, bolu sira mai halo emerjénsia deit nune’e movimentu ne’e bele la’o,” nia katak.
Tuir observasaun Jornalista Agência Tatoli iha terrenu nota katak, movimentasaun transporte públiku diresaun Cailaco ba Maliana sei normál hela hanesan bainbain.
Enkuantu tuir dadus 2022, postu administrativu Cailaco iha aldeia 24, suku hitu ho totál populasaun 10,347, kompostu hosi feto 5101, mane 5,246 ho totál xefe família 2,107.
Notísia relevante: Komunidade halerik bá kondisaun estrada urbana Cailaco-Maliana
Jornalista: Sérgio da Cruz
Editór: Evaristo Soares Martins
