BAUKAU, 08 Abríl 2026 (TATOLI) – Motorista husu Ministériu Transporte no Komunikasaun (MTK) liuhusi Diresaun Nasionál Transporte Terrestre (DNTT) atu hasa’e folin transporte publiku ho razaun folin mina sa’e.
Portavós Transporte Publiku Baukau, Joanico Abreo Gama, esplika, motorista iha Baukau deside no konkorda la halo movimentu tanba relasiona ho folin kombustível sa’e ne’ebé afeta ba rendimentu transporte publiku.
“Ami deside lakohi halo movimentu to’o hetan solusaun mak foin kontinua opersionaliza transporte publiku,” Joanico Gama hateten bainhira hala’o asaun pasífika iha Vila Nova, Kuarta ne’e.
Joanico Gama husu DNTT atu fo-sai sirkulár hodi hasa’e orsamentu hanesan estudante husi sentavu 10 ba sentavu 15, Ensinu superiór husi sentavu 15 ba sentavu 25, funsionáriu no pasajeiru idade boot nafatin sentavu 25 maibé aumenta ho osan ne’ebé nu’udar estudante.
Nia hasoru ona DNTT Baukau no konkorda halo karta ejizensia nune’e sei envia ba nasionál hodi buka solusaun ba situasaun ne’ebé akontese atuál iha Timor-Leste.
“Husu ba MTK atu hasai karta sirkulár ba transporte públiku nune’e pasajeiru sira kumpre tuir ami-nia ezizensia no ami kompromete sei hatún bainhira folin mina normál fali,” Joanico akresenta.
Entretantu, husi observasaun TATOLI iha terrenu movimentu transporte publiku iha Baukau Vila hanesan diresaun Vila Nova ba Antiga ho marka A1 no A2 paradu la halo movimentu nune’e halo estudante no komunidade la’o-ain.
Enkuantu, totál sentru abastesimentu iha Baukau hamutuk 11 kuaze hasa’e folin mina hanesan gazolina kada litru hahú husi $1.40 sentavu to’o $1.50 no gazoel hahú husi $ 1.60 to’o $1.65 kada litru.
Notísia relevante: Folin transporte públiku husi Kelikai Antigu hahú sa’e
Jornalista: Natalino Belo
Editór: Evaristo Soares Martins
