DILI, 22 agostu 2023 (TATOLI) – Ministra Saúde (MS) Elia Amaral, dehan iha Orsamentu Retifikativu (OR) tau millaun $5.4 ba Servisu Autónomu Medikamentu Ekipamentu Saúde (SAMES) hodi sosa ai-moruk.
“Ministériu Saúde iha Orsamentu Retifikativu ne’e ita tau millaun $5.4 ba SAMES hodi sosa ai-moruk nune’e bele asegura to’o tinan oin”, Ministra Elia ba jornalista sira iha Parlamentu Nasionál, ohin.
Rekorda fali katak iha fulan abríl ba kotuk, MS liuhosi VIII Governu Konstitusionál halo ona karta ba Ministériu Finansas (MF) atu disponibiliza orsamentu millaun $4 hodi halo akizisaun ba ai-moruk stock out iha teritóriu nasionál.
Iha Orsamentu Jeral Estadu (OJE) ne’ebé Governu da-ualu aprezenta ba Parlamentu Nasionál iha tinan kotuk aloka $9,235,500.00 ba SAMES maibé la to’o atu sosa ai-moruk ho nune’e iha fulan hira ba kotuk MS hasoru problema boot kona-ba ai-moruk menus iha teritóriu nasionál.
Jornalista: Hortencio Sanchez
Editór : Zezito SIlva
