Klínika Saõ Lazaro Oélbamba’i iha Oésilo ‘reativa’ ona hodi presta servisu saúde

OEKUSI, 28 Jullu 2026 (TATOLI) –Misaun Lepra Timor-Leste (MLTL) hamutuk  ho Autoridade Rejiaun Administrativa Espesiál Oekusi Ambenu (RAEOA) no Igreja Kátolika, reativa fali Klínika São Lazaro Oélbamba’i hodi fó asisténsia saúde maternidade inan no oan espesialmente ba moras lepra.

Klínika São Lazaro ne’e, lokaliza iha estasaun Oélbamba’i aldeia Sifin Suku Usitasa’e sub-rejiaun Oésilo, ne’ebé konstrui iha 2010 no kontinua abandonadu to’o ohin loron.

Tanba ne’e, Prezidente Autoridade RAEOA Régio da Cruz Salu, hato’o sentimentu ksolok ba Igreja Kátolika no Misaun Lepra Timor-Leste, bele funsiona hikas fasilidade ne’e hodi fó asisténsia saúde ba pasiénte lepra.

“Agradese ba Igreja Katólika liuhusi Dioseze Dili mai to’o Párokia Oésilo, tanba fó fatin ho konsiderasaun alta, nune’e Governu ho nia parseriu bele kontinua harii klínika ida-ne’e, tenke funsiona ona atu haree ba moras kontasioza sira,” nia hateten iha Oélmambai.

Autoridade ne’e fundamenta, problema saúde iha Oekusi kontinua aumenta tanba bazeia ba dadus ne’ebé Autoridade simu husi parseiru sira katak daudaun ne’e rejista ona kazu 45 iha Oekusi, ida-ne’e mós sira-ne’ebé ho konsiénsia ba deklara an iha fasilidade hodi hetan tratamentu, la inklui sira-ne’ebé lakohi koopera, bele liuhusi kazu 45 ne’e.

“Tanba ne’e ita-nia esperansa no fiar katak, ho fasilidade ne’e bele kontribui redus mós kazu lepra iha Oekusi liliu perténsia Oésilo nian, ne’ebé ohin ita entrega no destaka pesoál saúde sira, komesa aban ba oin tenke funsiona nafatin,” nia hateten.

Notísia relevante:Saúde Oekusi rekomenda ativa hikas atendimentu klínika moras lepra iha Oélbamba’i

Iha biban ne’e, Prezidente Misaun Lepra Timor-Leste, Dulce da Cuna, selebra akordu mai husi parte tolu, Misaun Lepra, Serbisu Saúde Rejionál no Igreja Katólika, tanba parte tolu ne’e iha kompeténsia atu asegura fasilidade ne’e.

“Akordu ne’e atu asegura funsionamentu klínika ne’ebé ita renova ona,  bele la’o di’ak no serbisu na’in-sira bele hela metin iha fatin ne’e atu fó asisténsia saúde integradu liliu saúde materna ba inan no oan no foku atendimentu ba moras lepra. Ami orgullu tebes, bele hola parte iha projetu ida-ne’e, ami-nia kna’ar misaun lepra la’o tuir Kristu nia ain fatin, entaun ami koko la’o nafatin halo tuir saida maka Kristu hakarak bainhira halo atendimentu,” nia orgullu.

Nia espera katak, klínika ida-ne’e la’ós operasaun ba tinan ida to’o tinan tolu de’it,  maibé klínika ne’e bele eziste nafatin to’o jerasaun ba jerasaun, bele utiliza fatin ne’e hanesan fasilidade atendimentu saúde ne’ebé integradu ba moras hothotu no prioritiza ba moras lepra.

“Fasilidade ida-ne’e MLTL hetan apoia fundu orsamentu mai husi Misaun Lepra Timor-Leste, hodi bele instala fasilidade sira iha klínika ne’e komposta husi mobiliáriu no fasilidade médiku sira, tanba fasilidade ne’ebé instala iha sentru ne’e ekivalénsia ho fasilidade sira iha sentru saúde no ospitál atu responde ba atendimentu saúde la’ós primária de’it maibé bele sekundáriu ona,” nia hateten.

Notísia relevante:Saúde Oekusi hala’o akampamentu triajen masál no konsulta espesialidade iha Oesilo 

Entretantu, hafoin reativa, Serbisu Saúde Rejionál, destaka kedas profisionál saúde sira, komposta husi enfermeiru, parteira, médiku no seluktan. Klínika São Lazaro ne’e,  konstrui iha 2010 apoia husi kooperasaun ho España liuhusi pastorál ba saúde, ne’ebé halo inaugurasaun husi bispu matebian Dom Alberto Ricardo da Silva.

Klínika Saõ Lazaro to’o oras ne’e daudaun funsiona ona durante loron neen, hahú husi kinta-feira to’o agora no ba oin.

Jornalista: Abílio Elo Nini

Editór: Rafael Ximenes de A. Belo