DILI, 24 dezembru 2022 (TATOLI)—Arsebispu Arkedioseze Metropolitana Dili, Don Virgílio Cardeal do Carmo da Silva, fó-sai katak Natál nu’udar festa esperansa ba sarani katólika iha mundu tomak.
“Natál mak festa esperansa nian tanba Natál mak ita rona liafuan hosi anju sira-ne’ebé haklaken iha ita-nia leet, ho Maromak ita ida de’it,” Cardeal do Carmo da Silva esplika liuhosi prezide selebrasaun misa Natál iha Igereja Katedrál, Dili, sábadu ne’e.
Bispu Virgílio akresenta, moris iha esperansa iha nível saida de’it no importante tebes iha moris ne’e. Bainhira lakon esperansa mak hamosu risku sira, hanesan falta sensibilidade entre sarani sira no falta esperansa bele konsidera komunidade ne’e mate, tanba moris laiha tán ona.
Cardeal Virgílio haktuir, baihira Maria tuur ahi ho oan mane ida hatoba iha balada haan fatin, tanba labarik ne’e moris hanesan ho kosok-oan bainbain.
Maibé Maromak oan ne’e moris ho loloos, iha animál nia haan fatin hanesan loos profeta Isaías dehan, karau sira hatene ninia na’in no kuda buru mós hatene nia naoin ne’ebé tau matan ba nia.
“Tanba ne’e kalan ida ita sarani bele halibur hamutuk, halibur nu’udar komunidae sarani no halibur nu’udar ema sarani atu selebra festa Natál ,” Don Virgílio haklaken.
“Mai ha’u, Natál sai hanesan momentu ida, ema ko’alia kona-ba pás, ko’alia kona-bá família, apelu ba família halo apelu ba pás nian,” Bispu Virgílio fó hanoin ba sarani sira.
Arsebispu Arkedioseze Metropolitana Dili ne’e hateten, bainhira família halibur hamutuk hodi haan iha uma ida la signifika selebrasaun Natál hotu ona.
Maibé hosi situasaun sira hanesan ne’e hanoin didi’ak hodi deskobre hatene loloos natureza festa Natál nian mak ida oinsá loos, tanba ne’e ho Natál ne’e hamutuk hodi lori pás no dame ba malu iha nain jesus nia moris ida-ne’e.
Jornalista : Felicidade Ximenes
Editór : Evaristo Soares Martins
