DILI, 07 Abríl 2025 (TATOLI)-Okupante aredór eskola Ensinu Báziku Sentrál (EBC, sigla portugés) 10 Dezembru Komoro konkorda ona atu hamamuk fatin ne’ebé sira okupa maibé husu ba governu atu hasai sira ho dignu.
Diretór eskola referida, Calistro Guterres, informa autoridade munisípiu Dili tantu xefe aldeia no xefe suku realiza ona enkontru ho okupante sira iha loron 21 Marsu liubá.
“Dadus foti no hatama ona ba edukasaun, hein komunidade simu notifikasaun. Sira pronto koopera no sira hein de’it notifikasaun husi nasionál”, Diretór eskola hatete.
Dirijente eskola ne’e dehan xefe família hamutuk 13, profesór iha uma-kain neen mak iha laran no restu ne’e mesak estudante no família profesór nian.
Adriana Freitas Ximenes hanesan okupante aredór eskola 10 Dezembru Komoro, hatete prontu koopera ho governu hodi halo dezenvolvimentu edukasaun ba futuru ne’ebé di’ak.
“Ita koordena ona ho parte nasionál iha fulan-Marsu no sira fó informasaun katak ami hein notifikasaun husi sira”, nia dehan ba TATOLI iha aredór eskola 10 Dezembru Komoro, segunda ne’e.
Nia hatutan: “Enkontru ne’e mós parte nasionál hatete komunidade buka fatin hodi hela. Ida-ne’e ami agradese tebes, tanba atu ko’alia karik fatin ne’e estudante barak mak susesu. Entaun bainhira sira mai dehan sai ba buka fatin ne’e ami prontu sai”.
Iha fatin seluk, Diretór Servisu Edukasaun Munisípiu Dili, Sabino da Costa Pereira, hatete ninia parte hahú uluk ona enkontru ho eskola 10 Dezembru Komoro.
Nia dehan karta notifikasaun sei fó sai husi Diresaun Terras Propriedade. “Sira hela iha ne’ebá tempu naruk no durante ne’e lahalo arrendamentu ba Estadu no ha’u hanoin sira iha konsiénsia hodi muda”.
Planu tuir mai, nia dehan sei kontinua ho eskola ida iha Bidau, tuir mai Sergio Viera de Melo, depois eskola sekundária jerál 4 Setembru UNAMET Balide, hafoin ba eskola sira-ne’ebé mak ema hela ida no rua de’it, inklui Pre-eskolár ida iha Kulau Bekora nian.
ME rejista uma-kain hamutuk 72 ne’ebé okupa arredór eskola iha munisípiu Dili, husi totál ne’e uma-kain 52 hela iha arredór eskola ensinu báziku ho filiál sira, restante okupa eskola ensinu sekundáriu jerál no tékniku vokasionál.
Eskola sira ne’ebé komunidade okupa mak eskola báziku Sérgio Vieira de Mello, 10 Dezembru, ensinu báziku filiál númeru 5 Komoro, ensinu báziku sentrál 30 Agustu, eskola ensinu sekundáriu jerál 04 Setembru UNAMET Balide, EBC Bidau Akadiru-hun, eskola sekundária tékniku vokasional indústria no teknolojia Bekora no eskola sira seluk tan.
Notísia relevante: SEM Dili koordena autoridade munisipál solusiona okupante aredór eskola
Jornalista : Osória Marques
Editora : Rita Almeida
