DILI, 18 Novembru 2025 (TATOLI) – Parlamentu Nasionál aprova proposta Orsamentu Jerál Estadu (OJE) tinan fiskál 2026 ba Ministériu Asuntu Kombatente Libertasaun Nasionál (MAKLN) ho montante $199.906.277 iha faze espesialidade ho votu a-favór 44, kontra 0 no abstensaun 18.
Orsamentu ne’e aloka ba saláriu no vensimentu $1.584.358, bens no serbisu $7.655.718, transferénsia públika $187.694.349 no kapitál dezenvolvimentu $2.971.802.
Proposta OJE ne’e finansia Programa Funsionamentu no Dezenvolvimentu Instituisionál hetan alokasaun $3.620.487 no Programa Inkluzaun Sosiál $196.285.740.
Durante apresiasaun OJE deputadu sira fó apresiasaun ba Governu Dasiak liuhusi MAKLN ho esforsu makas hodi rezolve problema liga ho dadus kombatente rejistadu tinan 2009 ne’ebé fó-sai iha 15 Janeiru tinan ne’e hafoin hetan reklamasaun barak husi veteranu no kontestante sira.
Hodi solisita atu tau atensaun ba indivídu balun deskonfia halo falsifikasaun dokumentu no ba hirak-ne’ebé konklui laiha problema, bele halo pagamentu no sira ne’ebé iha kontestasaun atu re-verifika fila-fali.
Hodi enkoraja nafatin MAKLN mantein nafatin tuir lei Estatutu Kombatente Libertasaun Nasionál katak prosesu verifikasaun no rekoñesimentu bazeia ba realidade hodi determina kada ema ida nia direitu.
Ministru Asuntu Kombatente Libertasaun Nasionál, Gil da Costa ‘Oan Soro’, agradese ba rekomendasaun sira ho fallansu barak koko rezolve maibé ministériu mesak labele, presiza parte hotu hamutuk.
Notísia relevante:https://tatoli.tl/2025/08/06/makln-simu-tetu-millaun-iha-tinan-2026-no-la-husu-adisional-iha-kro/
Jornalista: Nelson Sousa
Editór : Evaristo Soares Martins
