DILI, 06 Agostu 2025 (TATOLI)—Ministru Asuntu Kombatente no Libertasaun Nasionál, Gil da Costa Monteiro ‘Oan-Soru’, hamutuk ho Sekretáriu Estadu Veteranu, César dos Santos da Silva, no ekipa, Kuarta ne’e, halo ona aprezentasaun kona-ba programa prioridade proposta sira iha tinan 2026 iha reuniaun Komite Revizaun Orsamentu (KRO).
“Ami-nia orsamentu laiha adisionál. Ami-nia tetu fiskál ne’e millaun $201. Ida-ne’e sufisiente,” Ministru Oan-Soru hateten iha Ministériu finansa, Aitarak-laran.
Orsamentu ne’e hodi ba programa konstrusaun jardín erói iha territóriu no programa seluk tan.
“Ba fatin ne’ebé mak agora obra la’o hela hodi prevee nafatin orsamenta para balun ne’ebé mak bele konklui, konklui daudaun ona, balun ne’ebé mak seidauk konklui kontinua obra,” nia akresenta.
Notísia relevante : OJE 2025, MAKLN ezekuta ona 20%
Aleinde ne’e, MAKLN ho orsamentu ne’e sei kontinua programa sira ne’ebé seidauk konklui inklui pagamentu ba veteranu rejistradu sira.
MAKLN nia ezekusaun orsamentu seidauk atinje metade husi orsamentu tanba pagamentu ba rejistu daruak, daudaun mosu hela reklamasaun.
“Iha fulan-Dezembru dalaruma halo pagamentu balun mak nia pursentu bele sa’e. Agora ami foin mak 27%. Ida-ne’e ba programa konstrusaun jardín eroi ne’ebé daudaun la’o hela inklui pagamentu pensaun ne’ebé la’o hela. pagamentu ba rejistu daruak ne’e seidauk, maibé sei halo iha fulan-Dezembru mak nia pursentu bele sae maka’as,” nia tenik.
Jornalista : Osória Marques
Editora : Julia Chatarina
