DILI, 07 Juñu 2025 (TATOLI) – Governu liuhUsi Ministériu Asuntu Kombatente Libertasaun Nasionál (MAKLN), ezekuta ona pursentu 20 husi Orsamentu Jerál Estadu (OJE) 2025, iha trimestre dahuluk.
“MAKLAN nia ezekusaun orsamentu ba tinan ida-ne’e atinje ona 20%, ekivale ho osan $41.048.068,93”, Sekretáriu Estadu ba Asuntu Veteranu, César dos Santos da Silva ‘Merak’, dehan ba TATOLI, iha nia kna’ar fatin Kaikoli, ohin.
Governante ne’e esplika husi totál orsamentu ne’ebé gostu ona ne’e ba saláriu no vensimentu $685.456,30, bens servisu iha $1.389.659,65, transferénsia públiku hamutuk $39.010.339,25, kapitál menór sei zero hela, no kapitál dezenvolvimentu iha $86.493,65.
Merak dehan saldo ne’ebé hela hamutuk $166.021.067,07. Husi totál orsamentu aprovadu hamutuk $207.069.136.
Iha trimestre daruak ne’e kontinua halo verifikasaun ba lista editál tinan 2009, lista pendente sira inklui projetu sira hanesan konstrusaun jardín eroi.
Iha proposta Orsamentu Jerál Estadu (OJE) 2025, hodi kontinua programa pensaun ba veteranu no selu ka halo pagamentu ba veteranu rejistadu iha tinan 2009.
“Ba 2025 orsamentu prevee millaun $207, hodi selu pensaun veteranu inklui ona rejistu sira 2009 nian, tanba ein-prinsípiu estatutu kombatente ko’alia iha ne’eba lei ne’e prodús efeitu iha janeiru 2025. Entaun, Janeiru 2025 ami anúnsia sai lista ba públiku para hodi halo reklamasaun, balun reklama sa’e no balun reklama sai, ida-ne’e mak regra reklamasaun,” Governante ne’e dehan.
Jornalista : Osória Marques
Editór: Florencio Miranda Ximenes
