DILI, 07 outubru 2023 (TATOLI)—Organizasaun Naun Governamentál hosi Japaun, Pacific Asia Resource Center (PARCIC), sábadu ne’e, ofisialmente lansa ba públiku loja no kafé Aroma Timor, iha Pateo, Dili, hodi promove produtu rai-laran.
Loja ne’e loke direta hosi Ministru Komérsiu Indústria, Filipus Nino Pereira, no Embaixadór Japaun iha Timor-Leste, Kimura Tetsuya.
“Lansa loja aroma Timor ne’ebé própriu fa’an de’it protudu rai-laran, ida-ne’e hamosu sentidu orgullu no patrotizmu. Protudu rai-laran ezije ita atu konsumu no utiliza, ida-ne’e mak benefísiu mai ita, katak ita sente hamoris ita-nia ekonomia, atividade ekonomia, ne’ebé ita prodús hodi haluan tan merkadu,” Ministru hato’o liuhosi ninia intervensaun, iha Pateo.
Governante ne’e dehan, agrikultór sira sei fa’an
produtu no haluan koñesimentu hodi bele dezenvolve ekonomia família no kontribui ba dezenvolvimentu ekonomia nasaun inklui hametin kresimentu ekonomia.
Tuir governante ne’e, setór privadu makro no mikro importante ba ekonomia rai-laran, nune’e presiza promove liután.
“Ita nafatin iha esperansa, ho apoiu hosi Japaun, ho kompromisu no dedika-an nafatin serbí ita-nia maluk sira seluk, ministériu prontu koopera hamutuk ho ekipa hodi serbisu hamutuk liután hodi bele kontribui ba prosesu dezenvolvimentu ita-nia rai hodi hametin ekonomia,” nia tenik.
Notísia relevante : PR Horta inaugura loja rede soru-na’in
Governante ne’e felisita no orgulu tebes ho estabelesimentu foun ne’e, nune’e produtór sira bele hamriik hodi haree produtu rasik.
Iha biban hanesan, Embaixadór Japaun, Kimura Tetsuya, parabeniza PARCIC tanba bele loke loja ne’e ho susesu.
“PARCIC serbisu hamutuk ona ho povu Timor desde tinan 2002, espesialmente ho agrikultór kafé no feto rurál sira. Hosi tinan 2013-2018 liuhosi parseria ho JICA, kria ona marka ida hanaran Aroma Timor, ne’ebé hanesan rede ida entre grupu feto 16 iha Ainaro, Covalima, Aileu, Ermera, Bobonaro no Liquiçá atu promove protudu lokál sira ne’ebé grupu feto sira halo. Rede ne’e asegura ona rendimentu metin ba feto rurál sira, tanba halo produsaun no fa’an produtu lokál hirak ne’e sai ona atividade regulár,” nia akresenta.
Iha sorin seluk, Embaixadór agradese ba apoia hosi Instituto de Camões, ba kriasaun loja no kafé ne’e hodi fa’an produtu oin-oin.
Nune’e mós, Diretora PARCIC, Junko Ito, hateten, loja ne’e fa’an produtu lokál hanesan kafé, xá no dose, ne’ebé halo ho ingridente lokál hanesan lakeru, fehuk midar ho seluk tan, ne’ebé prodús hosi grupu agrikultór, kooperativa no grupu feto hosi munisípiu sira.
Durante ne’e, organizasaun ne’e iha tipu atividade hanesan exportasaun kafé, sosa no fa’an fali produtu lokál iha loja, ne’ebé daudaun akumula traballadór 30-resin.
PARCIC exporta kafé ho tolenada 30 no xá herbal kilograma 200 resin bá Japaun, kada tinan.
Durante ne’e PARCIC hala’o atividade ho apoia hosi parseiru sira hanesan Embaixada Japaun liuhosi JICA no parseiru sira seluk, enkuantu estabelese loja Aroma Timor hetan apoiu hosi Institutu Camões.
Serimónia lansamentu estabelesimentu komersiál foun marka prezensa hosi grupu agrikultór no grupu feto hosi munisípiu sira.
Jornalista : Nelson de Sousa
Editora : Julia Chatarina
