BOBONARO, 17 marsu 2023 (TATOLI) – Hahú hosi tinan 2021 to’o tinan 2023 lori sorte-aat ba agrikultór aldeia rua iha suku Ritabou, postu administrativu Maliana, munisípiu Bobonaro tanba peste karakól ataka hare-oan ne’ebé foin kuda.
Xefe suku Ritabou, Maximiano dos Santos Araújo, hateten ho atake peste refere agrikultór aldeia rua mak hanesan Mole-Anan no Halekou deside hapara atividade produsaun to’o agora.
Notísia relevante: MAP husu agrikultór Maliana halibur karakol iha natar laran
“Aldeia rua ne’e mak tinan rua ba kotuk kedas la halo natar, sira ida sa’e mai parte Bubur-laran parte Mau-Mali nia sae fali rai-maran nian mak halo, kuandu tún fali ba fali Dare-Halekou ne’e, hau foin horisehik ho horibainrua iha-ne’ebá katak, sira tinan ida-ne’e la halo, sira na’in hira de’it mak hala’o,” Nia ko’alia iha sede suku Ritabou, sesta ne’e.
“Ita haree iha Helekou por-volta 200 ektare inklui sira-ne’ebé mak la halo no sira-ne’ebé halo, Mole-Anan mos hanesan parte Dare ne’e só sira-ne’ebé halo hodi kbiit ne’e sira-ne’ebé hatama bee ba depois liu loron ida nia maran, maibé ida-ne’ebé bee nunka maran ne’e la halo tanba karakól ne’e halibur malu kuandu bee iha,” nia katak.
Maximiano dehan, maske iha tinan kotuk autoridade lokál suku hotu ne’ebé pertense iha Maliana hamutuk ho lia-nain sira halo tuir ona dalan kultura atu prevene ameasa hosi peste refere.
“Maibé buat ne’e nafatin iha to’o agora, liga fali ba parte governu nia ita ko’alia ona, pelumenus iha ka lae ai-moruk ruma atu hamate buat ida-ne’e, maibé to’o agora seidauk iha ai-moruk atu oho karakól ne’e,” nia hateten.
Notísia relevante:Peste Karakol hahú ataka natar ektare 300 iha Maliana
Jornalista : Sergio da Cruz
Editór : Evaristo Soares Martins
