BOBONARU, 26 Novembru 2025 (TATOLI) – Komandu Polísia Nasionál Timor-Leste (PNTL) munisípiu Bobonaru garante estabilidade no orden públika iha ámbitu komemorasaun Loron Proklamasaun Independénsia ba da-50, ne’ebé sei akontese iha sidade Maliana no postu administrativu lima seluk iha 28 Novembru ne’e.
Komandante Polísia Bobonaru, Superintendente Xefe Agostinho Gomes da Silva, subliña katak elementu hotu-hotu iha sosiedade iha papél vitál hodi fó apoiu ba eventu nasionál ne’e la’o ho di’ak.
Nia husu ba komunidade Bobonaru sira atu hatudu dixiplina no mantein armonia iha eventu sira-nia série tomak.
Notíasia relevante: Bobonaru selebra tinan 50 Proklamasaun ho marsa no kampaña violénsia kontra feto
“Hatudu ita-nia identidade no kapasidade hanesan Bobonaru-oan, tanba ne’e, husu ita hotu nia responsabilidade. Konserteza katak atu hala’o atividade sira hanesan ne’e, seguransa importante. Tanba ne’e, husu kontribuisaun parte hotu-hotu atu iha responsablidade garante estabilidade no orden públika hodi realiza atividade ne’e”, nia hateten iha Jináziu Maliana, ohin.
PNTL Bobonaru prepara ona estratéjia seguransa integrada, liuhusi koloka pesoál sira ba pontu estratéjiku sira, inklui fatin eventu prinsipál, dalan tránzitu nian, no área públiku sira ho potensiál ba ema lubun boot, enkuantu koordenasaun ho autoridade lokál no komunidade lokál mós la’o hela.
Aniversáriu proklamasaun independénsia ba da-50 nu’udar momentu istóriku ida ba Timor-Leste nia mahorik sira hotu. Tanba ne’e, PNTL hein katak sidadaun hotu bele partisipa ho pozitivu hodi kria ambiente ne’ebé seguru, ordenadu no unidu.
Iha semena kotuk ne’e, komisaun organizadora loke ona eventu sira hanesan kántiku kore-metan, feira produtu lokál no artezanatu, marsa saudavel, halai maratona, kompetisaun tebe kulturá no atividade seluk tan.
Notísia relevante: Autoridade Bobonaru prevee rihun $40 hodi selebra 28 Novembru
Jornalista: Sergio da Cruz
Editora: Maria Auxiliadora
