OÉ-CUSSE, 03 juñu 2024 (TATOLI) – Komandu Polísia Nasionál Timor-Leste (PNTL), Rejiaun Administrativa Espsiál Oé-Cusse Ambeno (RAEOA),daudaun ona asegura hela rezidénsia Fulolo no limita sidadaun labele tama la ho objetivu la laklaru.
“Ita hotu hatene, PNTL mumentu ba duni iha rezidénsia Fulolo, akompaña Prezidente Autoridade RAEOA, tanba hetan kontaktu direita husi Prezidente Autoridade, ne’e mak ami ba, maibé to’o agora bele dehan PNTL kontinua nafatin asegura, komandu rejionál orienta ona eskuadra Pante Makasar, halo planu seguransa konjunta, hodi asegura rezidénsia Fulolo, tanba rezidénsia ne’e agora daudaun iha hela problema nia laran,” Komandante PNTL Oé-Cusse, Superintendente Polísia Nicolau Francelino da Costa, ba jornalista sira iha Oé-Cusse, segunda ne’e.
Notísia relevante: Alkatiri keixa: Prezidente Autoridade RAEOA Rogeiro Lobato hatán
Dirijenti PNTL Oé-Cusse ne’e, fó sai, seguransa sivíl husi Diresaun Nasionál Prevensaun Konflitu Komunitária (DNPKK), daudaun koloka ona iha rezidénsia Fulolo, tanba ne’e parte PNTL nafatin koordena, nune’e labele iha estragu ruma husi ema deskoñesidu.
“Ami kontinua nafatin monitoriza, maibé ami konsidera mós seguransa sivíl sira, daudaun ne’e koloka ona iha fatin ne’e, iha parte ida mak ne’e, ami kontinua nafatin ami-nia serbisu maibé liña koordenasaun ho parte seguransa sivíl ne’e, agora daudaun iha rezidénsia Fulolo kontinua nafatin liña koordenasaun,” nia katak.
Tanba nia dehan, bainhira ema ruma atu tama ba komplexu rezidénsa Fulolo, presiza halo identifikasaun no justikasaun klaru, kona-bá objetivu nia vizita ne’e.
“Konserteza mak ne’e, ita evita ema sira-ne’ebé iha intensaun ruma iha ne’ebá, ita tenke prevene, no kuandu ema ho oin foun ruma tama iha ne’ebá, konserteza ita tenke identifika, tama ba ne’ebá atu halo saida, ita tenke halo identifikasaun ba sira,” nia informa.
Notísia relevante: Governu Sentrál fó konfiansa ba Autoridade RAEOA kona-ba rezidénsia Fulolo
Rekorda fali katak, iha loron 22 maiu liubá, Prezidente Autoridade RAEOA, Rogerio Tiago Lobato, hamutuk ho membru Autoridade no akompaña mós husi PNTL no serbisu terra no propriedade, vizita ofisiál ba iha rezidénsia Fulolo, lokaliza iha aldeia Sanane, suku Costa, sub-rejiaun Pante Makasar.
Iha ámbitu vizita ofisiál ne’e, Rogério Tiago Lobato, promete sei anula tiha dokumentu akordu kona-bá kontratu kompra venda fa’an uma Estadu iha rezidénsia Fulolo, ne’ebé selebra husi AntiguPrezidente Autoridade Mari Alkatiri no Arsénio Paixão Bano, tanba konsidera akordu ne’e abuzu podér.
Tuir Rogério Lobato, karta akordu kontratu promesa kompra e venda ne’e, autoridade sesante halo ona iha loron 23 outubru 2017, abaixu assinadu husi Arsénio Paixão Bano nu’udar Prezidente Autoridade ein-exersísiu nu’udar mós parte fa’an, ho kompradór mak Mari Bim Amude Alkatiri.
Notísia relevante: Abitante afetadu 76 iha Costa hato’o pontu 12 ba Governu Sentrál no Autoridade RAEOA
Jornalista: Abílio Elo Nini
Editór: Evaristo Soares Martins
