OÉ-CUSSE 16 outubru 2023 (TATOLI – Prezidente Autoridade RAEOA, Arsénio Paixão Bano, akompaña hosi Diretór Jerál Ministériu Negosíu Entranjeiru no Kooperasaun (MNEK), Francisco Cepeda Tilman hamutuk ho autoridade sira hosi distritu Timur Tengah Utara (TTU), segunda ne’e hatuur fatuk dahuluk ba projetu postu integradu iha fronteira Oésilo ho Napan Indonézia iha suku Bobometo.
Notísia relevante: RAEOA aloka rihun $510-resin harii postu integradu Oésilo
Prezidente Autoridade RAEOA, Arsénio Paixão Bano, konsidera projetu postu integradu Oesilo importante ba Timor-Leste atu hametin relasaun di’ak liután nasaun viziñu Indonézia hodi hasa’e kresimentu ekonómiku rai rua nian tanba Oé-Cusse Ambeno, liga direita ba distritu TTU-Kefamenanu.
“Ohin ita lansa ne’e, projetu pakote dahuluk, ita prepara fatin atu konstrui postu integradu Oésilo nian, iha faze dahuluk ne’e ita haree uluk alfándega sira-nia fatin ho alozamentu, ida-ne’e ba Timor-Leste no RAEOA ba ita-nia komportamentu no dignidade atu prepara servisu hamutuk ho Indonézia, ba objetivu atu hamenus kiak no hasa’e kresimentu ekonómiku ba Oé-Cusse no halo interasaun di’ak liután ho rai viziñu,” Arsénio Bano ko’alia iha ámbitu hatuur fatuk dahuluk ne’e.
Tuir nia, RAEOA prepara daudaun ona kondisaun, tanba iha nonu Governu ko’alia kona-bá preparasaun Timor-Leste atu tama ASEAN, entaun tenke book daudaun ita-nia infraestrutura bázika sira, liuliu estrada, postu integradu sira no tenke prepara rekursu umanu atubele simu servisu boot atu mai ne’e.
Jestór sub-rejiaun Oésilo, Domingos Marques, agradese ba Governu tanba bainhira postu integradu Oésilo funsiona hikas, sei kontribui hamenus tranzasaun ilegál iha fronteira, tanba dezde situasaun COVID-19 Governu taka to’o ohin loron.
“Ami orgullu tebes tanba ohin loron ami bele hetan kontrusaun ida, postu integradu Oésilo ne’ebé liga fronteira Napan, tanba durante ne’e komunidade hein hela ba ligasaun ekonomia no família bele la’o di’ak liuhosi fronteira ne’e, ha’u hanoin aban bainrua maka postu integradu harii ona, sei redús ita-nia movimentasaun dalan ilegál tanba sei liuhosi odamatan oin, ne’e ami agradese,” nia orgullu.
Projetu postu integradu Oésilo, ezekuta hosi kompañia Lifau Indah Unipesoál Lda, ho valór kontratu $510,516.73, orsamentu ne’e Autoridade RAEOA prevee hosi Orsamentu Jerál Estadu (OJE) 2023 nian ho durasaun kontratu tinan ida.
Nune’e mós obra ne’ebé kompañia sei konstrui maka hanesan postu integradu fronteira Oésilo no komplexu rezidénsia ba pesoál álfandega.
Notísia relevante: Pesoál Postu Integradu Sakato La Simu Osan ‘Over Time’
Jornalista: Abílio Elo Nini
Editór: Evaristo Soares Martins
