OÉ-CUSSE 18 jullu 2023 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) tinan ne’e reabilita estrada rejionál hosi aldeia Oébaha, suku Bobometo, liga ponte Bitopa, suku Usitasa’e, pertense ba sub-rejiaun Oésilo ho kustu $544,055.33.
Notísia relevante: Autoridade RAEOA mellora estrada foun iha Oésilo
Prezidente Autoridade, Arsénio Paixão Bano, hateten, estrada rejionál ne’e importante atu tulun komunidade sira populasaun iha sub-rejiaun Oésilo inklui sub-rejiaun Pássabe no Nitibe sorin tanba liga direita ho ponte Bitopa no ponte Noetoko.
“Ita lansa ona iha sábadu ne’e, projetu estrada rejionál ne’e sei fó benefísiu ba populasaun sira hosi sub-rejiaun Oésilo, Passabe, Nitibe, tanba inísiu loke estrada foun ne’e kompleta kedas ho ponte, tanba iha tempu udan difikulta tebes populasaun sira hodi hakat mota Noel-Ekat entaun autoridade dezde tinan kotuk deside halo melloramentu estrada rurál refere hosi Unidade Jestaun Ekipamentu, agora iha kontinua kedas ba reabilitasaun,”Arsénio Bano, dehan ba jornalista sira iha Oé-Cusse, segunda ne’e.
Notísia relevante: Udan difikulta konstrusaun ponte Noetoko no Bitopa
Ezekutivu informa, iha tinan ne’e halo planu tau orsamentu no prosesa aprovizionamentu ba konkursu publika rezultadu kompañia Irmão Timor mak ezekuta, ho orsamentu $544,055.33, nune’e nia espera kompañia atu kumpre kontratu nune’e bele finaliza tuir tempu ne’ebé termina ona.
“Ita mós husu inan-aman sira no komunidade hotu iha suku Bobometo no Usitasa’e atu koopera ho kompañia nune’e kompañia bele aselera projetu ne’e, bainhira udan monu rai ita bele uza ona,” nia apela.
Diretór Rejional Infraestrutura, Candido dos Reis Amaral, informa projetu estrada rejionál ne’e sei hahú hosi Oébaha hodi liga ponte Bitopa ho distánsia kilómetru 7,2.
“Iha diskusaun tékniku ho Autoridade deside tau orsamentu ba Estrada refere, halo moru no bee dalan, tanba estrada ne’e iha foin loke iha tinan kotuk presiza halo reabilitasaun tanba estrada sai alternativa ba komunidae sira iha sub-rejiaun tolu atu asesu mai iha zona sentrál Pante Makasar,” nia katak.
Purtantu, projetu ne’e kompañia Irmão Timor Unipesoál Lda, mak ezekuta ho valór kontratu $544,055.33, orsamentu ne’e Autoridade RAEOA aloka hosi Orsamentu Jeral Estadu (OJE) 2023 ho nia durasaun servisu fulan sia.
Notísia relevante: RAEOA aloka millaun $1-resin manutensaun estrada no ponte sub-rejiaun tolu
Jornalista: Abílio Elo Nini
Editór: Evaristo Soares Martins
