VIKEKE, 25 Novembru 2025 (TATOLI)—Koordenadór Sentru Rekorrente husi Servisu Edukasaun Munisípiu Vikeke, Emídio Amaral relata sentru rekorente iha Munisípiu Vikeke hamutuk 15, ne’ebé daudaun ne’e sei ativu hodi hanorin abitante sira-ne’ebé paradu eskola no lahatene lee no hakerek.
“Kona-ba sentru rekorrente sira iha Munisípiu Vikeke hamutuk 15 ativu hela. Sentru rekorrente sira sei hahú halo fali rejistu foun ne’e iha Dezembru 2025. Prosesu aprendizajen sei implementa iha tinan 2026,” Emídio Amaral dehan ba TATOLI iha Postu Administrativu Vikeke Vila, Tersa ne’e.
Eis Diretór Servisu Edukasaun Munisípiu Vikeke hatutan sentru rekorrente ne’e atu ajuda abitante sira-ne’ebé iha tempu okupasaun Indonézia la eskola no paradu eskola bele halo rejistrasaun.
“Iha sentru rekorrente ne’e manorin sira husi suku, liuliu baxarelatu sira hanorin ita-nia abitante sira. Ha’u sente ensinu rekorrente ne’e fó benefísiu ba ita-nia komunidade ne’ebé lahatene lee no hakerek sira, tanba bainhira sira tuir tiha ensinu rekorrente sira bele asina sira-nia naran no balun konsege lee,” nia haktuir.
Emídio dehan, dezafiu ne’ebé sentru rekorrente sira enfrenta mak dalaruma abitante sira preokupa toos no natar ne’ebé fila tempu kalan, entaun manorin sira labele hanorin.
Tuir dadus, sentru rekorrente hamutuk 15 ne’e, kada postu eziste tolu ne’ebé hahú implementa husi Governu dahuluk to’o agora konsege fó hanorin ema hamutuk 2.000-resin iha Munisípiu Vikeke.
Jornalista: Vitorino Lopes da Costa
Editór: Xisto Freitas da Piedade
