DILI, 01 agostu 2024 (TATOLI)— Médiku jerál iha Sentru Saúde Comoro, Rina Jesuina da Cruz, informa, Sentru Saúde Comoro (SSC) detekta vírus ne’ebé afeta ba labarik sira hodi bubu iha glándula parótida.
Vírus Parotite mak moras ida-ne’ebé kauza husi infesaun viral ne’ebé kauza bubu iha glándula parótida sira iha oin. Iha kazu balun, moras ida-ne’e bele hamosu komplikasaun sira. Maibé, to’o agora, seidauk iha ai-moruk espesífiku atu trata parotite.
Vírus ida-ne’e kauza hosi infeksaun ne’ebé ataka glándula parótida iha ibun. Infeksaun ida-ne’e bele hamosu bubu no moras iha glándula.
“Parotitis ne’e vírus ida-ne’ebé sempre kona-ba labarik sira; idade 15 mai kraik. Entaun, nia kauza hahú hos isin manas no komesa bubu iha ita-nia kakorok parte sorin bubu kafuak ida lae bubu rua”, Rina Jesuina da Cruz informa ba jornalista sira iha SSC, ohin.
Profisionál saúde ne’e konta, Moras vírus foun ne’e, labarik barak mak hetan vírus foun ho naran parotite ne’ebé bele transmite ho fasil liuhusi anin no bele da’et lalais husi labarik seluk ne’ebé afeta ona vírus ne’e.
“Dalaruma labarik ne’ebé hetan ona labarik iha viziñu ka uma-laran ida-ne’ebé mak hetan ona moras ne’e, labarik sira ne’ebé di’ak hela karik nia imunidade ladun kapas bele hetan fila-fali moras ne’e,” nia dehan.
Bele kura
Médika Rina Jesuina da Cruz esplika, labarik ne’ebé afeta moras vírus referidu, bele kura tanba ne’e sira halo tratamentu tuir sintomátika.
“Isin-manas ita fó ai-moruk isin-manas nian ba no vitamina no bele kura semana rua ou liu depende ba labarik sira ne’e tenke han di’ak, hemu bee barak, han ai-fuan no labele hemu ka han hahan malirin,” nia fó hanoin.
Pesoál saúde ne’e informa katak sira detekta vírus ne’e liuhusi raan ne’ebé sira hasai husi labarik sira ne’ebé hetan ona moras ne’e maibé seidauk hatene loloos tanba presiza estudu ida kle’an ba moras referidu.
“Vírus ne’e variavel ida-ne’e ita labele temi tanba só bele halo tiha estudu mak ita bele hatene nia kauza loloos, tanba agora ita trata tuir sintomatolojia, agora kauza balun ita detekta husi hasai raan mak ita foin hetan vírus ne’e saida,” nia subliña.
Atu prevene ba moras ne’e, tuir médika timoroan ne’e mak tenke han ai-fuan sira, han hahan ne’ebé mak iha nutritivu nune’e imunidade kontinua forte hodi evita moras ne’e labele kona labarik sira.
“Tenke han di’ak, fase-liman, tanba se moras ne’e akontese bainhira kontaktu direita husi moras ida-ne’e bele kona konforme imunidade di’ak. Se Imunidade ladiak fasil atu hetan moras da’et hosi ema seluk”, nia konklui.
Jornalista : Felicidade Ximenes
Editór: Rafael Ximenes de A. Belo
