DILI, 20 Dezembru 2025 (TATOLI)-Similie Academy promove kriatividade estudante liuhusi kompetisaun codefest iha plataforma inovadór ba estudante sira hahú husi tinan-6 to’o adultu.
Jerente Similie Academy, Ana Paula da Costa Xavier, hateten kompetisaun ida-ne’e ho objetivu atu fó oportunidade ba estudante sira bele kria plataforma ho idea kriativa ho talentu ne’ebé sira iha hodi rezolve problema sira ne’ebé agora mundu hasoru.
Kompetisaun ne’e iha kategoria tolu ho tema kona-ba live bellow the water, water and sanitation no ikus liu kona-ba good health and well being.
“Husi kategoria tolu ne’e ami sei partilla ba estudante sira hodi hili kategoria ne’ebé sira prefere atu partisipa hodi kria sira-nia programasaun bazeia ba kategoria ne’ebé sira hili”, Ana Paula informa iha Kampung Alor, ohin.
Similie Academy ne’ebé foin loke iha fulan-Junu ne’e mai ho formasaun kona-ba coding ba labarik no komputadór.
“Iha Akademia Similie ne’e rasik loke formasaun ba estudante hahú husi labarik ho idade 6 to’o ema boot, no tinan oin sira sei loke tan formasaun kona-ba matemátika. Ha’u-nia esperansa ba estudante sira ne’ebé partisipa iha kompetisaun ne’e atu kontinua aprende no hasa’e abilidade liuhusi programasaun hodi empodera inovasaun”, nia hatutan.
Iha biban ne’e, júri Abreo Andre Boavida nia observasaun ba estudante infantil sira ne’ebé partisipa eventu ne’e iha poténsia tebes ba kualikasaun, tanba ne’e nia husu nafatin ba inan-aman atu dudu oan sira-nia mentalidade hodi promove sira-nia talentu liuhusi programasaun.
“Hanesan ohin projetu ki’ik oan sira ne’ebé ohin estudante sira kria furak tebes no ami avalia hodi define manán-na’in balun sai mellór klasifikasaun. Tuir ha’u-nia haree labarik sira ne’e iha poténsia tebes”, nia dehan.
Hodi salienta katak Akadémia Simile bele kontinua mellora formasaun ne’e atu forma labarik sira bele sai pilár importante ba kualifikasaun nian no husu ba estudante sira nafatin aproveita oportunidade ida-ne’e hodi espresa idaidak nia kapasidade no kriatividade hodi hadi’a frakeza ne’ebé sira hasoru, presiza adapta ba sistema teknolojia foun hanesan artifisiál intelijénsia (AI).
Jornalista: Alexandra da Costa
Editora: Maria Auxiliadora
