BOBONARO, 24 Agostu 2022 (TATOLI) – Sentru Komunitária Aprendizajen (SKA)-Kuda Ulun (KU) postu administrativu Maliana, munisípiu Bobonaro, hahú hosi fulan-jullu to’o agora oferese formasaun bázika ba estudante na’in-97 ho programa esensiál rua iha tinan 2022.
Notísia relevante: Governu inagura sentru komunitária aprendizajen iha Bobonaro
“Iha kursu komputador nian ne’e estudante na’in-47 no kursu lian inglés estudante hamutuk 50. Ami fahe ba turma rua, turma (A) na’in-25 no turma (B) na’in-25,” Koordenadór SKA-KU Maliana,Victor Tavares, ko’alia iha Maliana, kuarta ne’e.
Nia akresenta, hosi kursu programa rua ne’e estudante sira-ne’ebé partisipa iha formasaun bázika ne’e balu remata ona ensinu sekundariu, balu estudante ensinu baziku filiál (EBF), Holsa no ensinu Báziku Sentrál (EBC, sigla portugues) númeru I Maliana no eskola sekundariu Jerál (ESG) númeru I Don Martinho da Costa Lopez Maliana (DMCL) no eskola públiku sira iha kapitál Maliana.
Nia subliña, hosi totál estudante hirak-ne’e sei fahe turma bazea ba idade alunu, ba sira-ne’ebé idade tinan ualu to’o tinan 12 ne’e turma ida, sira 12 ba leten to’o 40 ne’e iha aula ida.
“Tuir loloos kursu ne’e ami aplika semana ida dala-rua, maibé tanba partisipante mai barak liu, entaun ami fahe turma, depois ami-nia treinadór na’in-rua de’it, sira na’in-rua mak hanorin hosi dadeer to’o lokraik, hahú hosi segunda to’o sesta,” nia informa.
Durasaun kursu ne’e depende ba progresu ne’ebe estudante sira atinje mak formadór sira foin rekomenda atu hetan sertifikadu.
Koordenadór ne’e dehan, daudaun ne’e tanba limitasaun formadór sei loke de’it ba programa rua, maibé ba oin sentru ne’e iha ona planu loke tan kursu lingua Korea no alfaiati.
Sentru ne’e harii hosihosi UNESCO iha Timor-Leste ho orsamentu $20.000.00, ne’ebé serbisu hamutuk ho Ministériu Edukasaun, Juventude no Desportu (MEJD)
Governu koreianu tulun Timor-Leste estabelese sentru komunitária ne’e atu fó formasaun no kapasitasaun ba komunidade ne’ebé konsideradu analfebetu hodi hakbiit sira-nia koñesimentu, nune’e bele kompete iha merkadu traballu iha nível lokál.
Notísia relevante:KNTL-UNESCO apoiu fundu harii Sentru Aprendizajen Komunitária tolu
Jornalista: Sérgio da Cruz
Editór: Evaristo Soares Martins
