KOVALIMA, 16 Janeiru 2026 (TATOLI) – Diretór Servisu Munisipál Água Saneamentu no Ambiente, Angelino Henrique, husu Servisu Munisipál Administrasaun Finansa atu kria konta bankária,, nune’e bele kontribui reseita ne’ebé nia fonte orsamentu mai husi distribuisaun bee tanke ba kliente sira.
“Ami husi Servisu Munisipál Agua Saneamentu no Ambiente (SMASA), mós konstribui reseita ba iha kofre Estadu ne’ebé nia fonte orsamentu mai husi distribui bee tanke, maibé reseita ne’ebé mak ami hetan rai de’it iha edifisiu, nune’e husu atu kria konta bankária hodi transfere direta ba kofre Estadu” Dirijente SMASA ne’e, hato’o iha salaun AMC, ohin.
Bazeia ba tarefa distribuisaun bee tanke litru rihun 5 ba kliente sira hanesan iha parte postu administrativu Zumalai- Tilomar no Maucatar ho nia folin $25, iha kapital munisípiu litru rihun 5 ho nia folin $12, ho nune’e reseita ne’ebé maka SMASA rai hela iha edifísiu kuaze $1.000.
Hataan ba kestaun ne’e, Diretora Servisu Munisipiu Finansa, Rosita Semei Amaral Freitas, klarifika,iha munisípiu Kovaliam dirasaun ne’ebé presiza atu loke konta bankária presiza submete pedidu ba Prezidente Autoridade munisipiu Kovalima, nune’e bele hatun despaxu ba servisu munisipál Finansa atu relata ba Ministériu Finansa
“Ha’u atu informa ba ita boot sira ne’ebé maka atu loke konta bankária hahú ohin ba oin submete ona pedidu ba PAM. Hafoin PAM hatun despaixu ba Servisu munisipál Finansa hodi relata ba Ministériu Finansa tanba atu loke konta bankária presiza lori tempu”, nia esplika.
Jornalista: Celestina Teles
Editór: Florencio Miranda Ximenes
