DILI, 28 jullu 2022 (TATOLI)–Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál, Falur Rate Laek, partisipa iha konferénsia nível Xefe Estadu Maiór Jenerál hosi INDO-PACIFIC, hanaran Chiefs Of Defense Conference (CHOD), ne’ebé realiza iha Sidney, Austrália.
“Oradór ne’ebé partisipa iha konferénsia mai hosi nasaun 29 no aprezentasaun ne’ebé halo exelente tebes no iha valór boot ba Timor-Leste. Ha’u rona aprezentasaun hotu no loron ikus mak ha’u halo intervensaun ba dala ikus, ha’u foka liu mak ba funu iha Ukrania no nia impaktu ba iha Timor-Leste, ne’ebé ha’u haree iha pontu rua, ida impaktu polítiku no ida seluk impaktu sosiál,” Tenente Jenerál Falur, hateten liuhosi nota ne’ebé Agência Tatoli asesu, kinta ne’e.
Notísia relevante: Membru F-FDTL nain-15 finaliza formasaun seguransa ba alta entidade
Enkontru nível a’as ne’e kada tinan sempre realiza no tinan ne’e (2022), Austrália mak sai nu’udar uma-nain ba eventu ne’e, ne’ebé partisipa hosi nasaun hamutuk 29.
Nune’e, tema ne’ebé sai diskusaun iha konferénsia durante loron-rua ne’e mak krize ambientál ho dezenvolvimentu teknolojia ba impaktu iha vida sosiál no funu iha Ukrania ne’e, impaktu negativu tebes ba INDO-PASIFICO nian.
Tenente Jenerál Falur dehan, Timor-Leste nia afirmasaun halo parte ba paz tanba Timor-Leste lakohi ona funu, nune’e durante aprezentasaun haktuir kompromisiu atu apoiu inisiativa hotu kona-ba paz no parseria ho nasaun viziñu sira ne’ebé hakarak servisu ba paz no bem star umanidade nian.
Delegasaun Timor-Leste nian ne’ebé partisipa iha konferénsia ne’e kompostu hosi Xefe Estadu Maiór Jenerál F-FDTL, Tenente Jenerál Falur Rate Laek, akompaña mós hosi espoza, Rosa Maria Quintão, Adidu Defeza Timor-Leste iha Austrália, Koronel Marcelino Ximenes no Adjuntu Adidu Defeza, Primeiru Tenente Nercio Alves, Xefe Kooperasaun Tékniku Militár, Kapitaun Domingos Oki, Ajudante Kampu CEMGFA, Kapitaun Juvinal Pinto, Sarjentu Mor F-FDTL, Alberto Freitas, Primeiru Sarjentu Desdelisen da Silva no Sekretária Ezekutivu CEMGFA, segundu sarjentu Roginha de Araujo.
Delegasaun desloka bá Austrália iha loron 22 jullu 2022, sei fila hikas mai Timor-Leste iha loron 31 jullu 2022.
Jornalista : Antónia Gusmão
Editora : Julia Chatarina
