DILI, 01 jullu 2022 (TATOLI)— Membru FALINTIL-Forsa Defeza Timor-Leste (F-FDTL) na’in-15 finaliza ona formasaun, atu asegura ka proteje alta entidade hanesan Prezidente Repúblika no Primeiru-Ministru hosi rai seluk bainhira halo vizita mai Timor-Leste.
Membru FALINTIL-Forsa Defeza Timor-Leste (F-FDTL), nain 15 tuir formasaun tátika no oinsá fó seguransa ba alta entidade sira durante semana rua iha Kuartel Polisia Militár.
“Formasaun ida ne’e, importante tebes ba iha membru F-FDTL, oinsá atu eleva koñesimentu no abilidade membru sira nian iha área tékniku batedores no prosedimentu operasionál sira, bainhira fó seguransa alta entidade sira mai vizita ita nia nasaun,” Reprezentante Xefe Estadu Maiór Jenerál F-FDTL, Xefe Gabinete no Koordenadór Konjuntu Estadu Maiór, Kapitaun Fragata, João da Silva, hateten iha Kurtél Polisia Militár kintal boot Dili, sesta ne’e.
Nia husu ba membru F-FDTL ne’ebé hetan oportunidade hodi tuir formasaun ida ne’e ba futuru bele aplika iha prátika tuir saida maka sira hetan ona.
“Ita agradese no husu atu kontinua realiza formasaun sira hanesan ne’e, hodi fasilita membru F-FDTL atu eleva sira nian koñesimetu tékniku hodi asegura ema importante sira,” nia afirma.
Iha biban hanesan, Komandante Interinu Unidade Polísia Militár, Kapitão Francisco Xavier dos Reis Neto hateten, formasaun ne’e halai liu ba tekniku oinsá segurasa ba alta entidade sira liuliu ba Prezidente Repúblika no Primeiru Ministru no entidade ne’ebé nia nivél hanesan Xefe Estadu Governu.
“Durante iha faze prátika uza motorizada no karreta haat ne’ebé hetan apoia hosi Xefe Estadu Maiór rasik. Formasaun ida ne’e, fasilita hosi Polisia Militár no Forsa Armada Brazil nian liuhosi kooperasaun ne’ebé maka iha. Ami nia prátika iha formasaun ne’e maka haree liu bá iha batedores, tiru no oinsá atu asegura ita nian alta entidade sira bainhira mosu situasaun sira ne’ebé ita la espera,” dehan Nia.
Nia husu, ba membru F-FDTL nain-15, maske formasaun ne’e ho tempu ne’ebé badak tebes, maibé husu membru sira tenke implementa iha futuru bainhira hetan fiar fó seguransa ba alta entidade sira.
Formasaun seguransa ba alta entidade partisipa hosi membru F-FDTL nain-15 ne’ebé mai hosi Komponete Terrestre, Komponente Aero, Komponente Navál, Unidade Sentru Formasaun Metinaru, no membru F-FDTL hosi Kuartel Jerál F-FDTL.
Jornalista: Natalino Costa
Editór : Florencio Miranda Ximenes
