DILI, 20 jullu 2025 ( TATOLI)- Femenina husi Portugál halakon Timor Leste liuhusi modalidade Tenis Kampu iha jogu desportivu CPLP ne’ebé realiza iha Dili.
Primeiru jogu feto Portugál halakon Timor Leste ho set 6-1. Husi ne’e Timor- Leste nafatin esforsu atu kontinua ba segundu set maibé femenina Portugál halo barullu iha kampu hodi nafatin manán iha jogu set daruak nian ho rezultadu 6-0.
Iha jogu Tenis Kampu nee lidera husi árbitru kampu A husi Angola, Henrique João, enkuantu árbitru husi kampu B husi Timor Leste, Frederico Sarmento.
Atleta husi kampu A femenina portugál, Beatriz Angelico hasoru Femenina Timor Leste Graciabeth Valosa, enkuantu kampu B atleta femenina husi Portugal Sofia Fereira hosoru atleta feto husi angolana Filomena Gonçalves.
Husi kampu B femenina Portugál halakon Femenina Angolana husi set dahuluk 6-2 no set daruak 6-0, husi ne’e femenina Portugál kontinua lidera kampu A ho B.
Husi kampu A ho B modalidade Tenis hahú hanesan ho oras 14:30 no remata iha oras 15:30.
Nune’e Portugál mak manán jogu ho modalidade Tenis Kampu ne’ebé realiza UNTL Sentrál, domingu ne’e..
“Ha’u kontente manán jogu primeiru iha Timor-Leste tanba ha’u esforsu di’ak tebes iha kampu atubele gaña iha jogu ne’e,” Beatriz Angelico espresa ho kontente.
Nia rekoñese iha set dahuluk atu tama kampu nervoza oituan tanba estraga bola barak.
”Ha’u nervoza tanba ha’u estraga bola barak iha set dahuluk nian, maibé ha’u kontrola emosaun, ikus ha’u bele manán Timor Leste iha modalidade Tenis Kampu,” nia katak.
Atleta Femenina Timor Leste, Graciabeth sente kontente tanba bele hasoru atlteta sira husi nasaun seluk.
”Maske lakon maibé la lakon ha’u-nia vontade iha futuru oin mai, tanba joga hanesan ne’e atu aumenta ha’u-nia esperiénsia oinsá atu halo di’ak liután iha jogu tuir mai,” nia espresa.
Jornalista : Felicidade Ximenes
Editór: Evaristo Soares Martins
