KOVALIMA, 26 Abríl 2025 ( TATOLI) – Padre pároku Igreja Nossa Senhora de Fátima Suai, Amu Aderito da Costa Vilár Morreira dehan, Vizita Papa Francisco mai iha Timor-Leste hodi fó hanoin ba timor-oan atu hadomi uma-kreda.
“Papa Francisco loke dalan mai ita sarani Timór atu ita hadomi ita nia uma-kreda no hadomi ita-nia fiar.Fiar ida-ne’e la’ós hanesan buat matak maibé Maromak saran ba ita liuhusi sakramentu sira”, Amu Pároku haklaken liuhusi nia omília bainhira prezide misa,iha Igreja Nossa Senhora de Fátima Suai, ohin.
Nailulik ne’e fó hanoin , atu sarani sira atu depozita fi’ar ba Nai Maromak, tanba Papa Francisco rai hela servisu sai hanesan tinan esperansa ne’e atu rai esperansa ba Nai Maromak.
Tuir esperiénsia ne’ebé iha direta no la direta, maibé papa kongese loke sarani sira nia fuan oinsá bele hadomi liután no besik uma-kreda no besik Maromak atu ‘lafaek’ labele tolan.
Prezensa Papa Francisco fó hanoin atu tau matan ba labarik sira, tanba labarik mak riku-soin nasaun no presiza rona mós katuas no ferik sira riku-soin nasaun iha sira tanba sira mak hatene didi’ak istória no identidade Timór.
Joven sira bele barullu, maibé rona no hadomi ferik no katuas nune’e labele iha Papa Francisco nia mensazen atu labele monu iha lafaek sira-nia lasu.
Iha Nailulik nia omília esplika kona-ba papa Francisco nia prezensa aleinde loke dalan ba timor-oan , nia mós hakarak haree tuir informasaun Timor 99% sarani kátolika no sarani hadomi igreja los ka la’e.
“Papa Francisco to’o iha Timor-Leste haree duni realidade hodi rai hela istória kle’an ba sarani timor-oan hodi dehan katak Timor iha ha’u-nia fuan. Ha’u hadomi Timor”, nia relembra.
Fó hanoin fali katak Governu sentrál aloka orsamentu mai iha Kovalima relasiona vizita Papa Francisco mai iha Timor-Leste hamutuk rihun $ 40 hodi gasta ba item konsumu no aluga karreta 220 atu tula peregrinu husi postu Fatululik, Fohorem, Fatumea, Tilomar, Maukatar Suai no Zumalai peregrinu hamutuk 4.500 rejista atu partisipa misa solene ne’ebé prezide husi Sua Santidade Papa Francisco iha 10 Setembru ne’e, iha Tasi-tolu Dili.
Jornalista:Celestina Teles
Editór: Rafael Ximenes de A. Belo
