DILI, (TATOLI) – Komunidade Protestante oras ne’e halo análize ba artigu 1474 lei kodigu sivíl, hodi husu konstitusionalidade ba Tribunál Rekursu nomós responsabilidade ba parte ne’ebé produz lei refere.
“Lei ne’e diskriminasaun boot. Ami ne’e iha Timor atu tau iha ne’ebé, soe de’it ka oinsá. Nasaun demokrátiku maibé halo lei la-justu, ida ne’e sira be halo lei ne’e tenke responsabiliza”, Moderadór Sinode Protestante Timor-Leste, Lorenço dos Santos ba TATOLI bainhira hasoru malu iha edifísiu Sinode, Komoro, kuarta (19/4).
Ho artigu ne’e, lider relijiaun Protestante ne’e haktuir sira nian parte ohin loron sai vítima. “Ami la simu artigu ne’e, parlamentu tenke tetu didiak atu altera, Governu mós tenke konsidera erru sira iha artigu ne’e”, afirma.
Atu evita diskriminasaun, reprejentante povu iha uma fukun tenke konsidera hodi buka solusaun.
Artigu ne’e iha pontu 2 hateten ”A Lei Civil reconhese valor e eficácia de casamento ao matrimónio católico e ao matrimónio barlaqueado monogâmico, nos termos das disposições seguintes” (lei sivíl rekoñese valór efikasia kazamentu matrimonio Katólika no Matrimonio Barlakiadu Monogámiko, tuir termu sira ne’ebé tuir mai) konsidera la a favór relijiaun seluk.
Jornalista: Manuel Pinto
Editora: Rita Almeida
