DILI, (TATOLI) – Reprezentante Prezidente Tribunál Rekursu (TR), juiz Deolindo dos Santos hatete TR iha kompeténsia atu haree finanseira Partidu Polítiku (ParPol) tanba kada partidu bele asegura transparénsia prosesu liuhosi konta bankaria rasik.
“Kada partidu tenke kria kontabilidade ne’ebé di’ak, iha konta bankaria rasik tanba partidu moris liuhusi fundu ne’ebé mak sira iha, fundu mai hosi membru no bele mai mos hosi fundu privadu”, tenik iha intervensaun semináriu XXI kona-ba papel sidadaun ba dezenvolvimentu no moris di’ak ho sub-tema: dame, justisa no toleránsia para hametin indepéndia nasionál iha Sentru Konvensaun Dili, foin lalais ne’e.
Lei kámara kontas dehan haree tuir konaba osan ne’ebé mai hosi Estadu ba sé no ba instituisaun ne’ebé. “Meíus sira estabelese iha konstituisaun hanesan lei ne’ebé fó kompeténsia ba Tribunál Rekursu atu prevene eleisaun ne’e labele mosu meius ne’ebé uza hodi prejudika partidu polítika seluk ou bele mosu aktu krime eleitorál”, katak tan.
Kona-ba aktu krime eleitorál, nia dehan, kompeténsia hosi autoridade polísia, ministériu públiku no tribunál. Lei define buat importante katak TR indika juiz tolu atu haree eleisaun eleitorál, mas bainhira haree situasaun atuál, Nasaun iha tribunál distritál haat ne’ebé iha kompeténsia boot.
“Tribunál Rekursu labele indika juiz tolu atu haree problema eleitorál iha timor laran”, realsa. Meius sira nu’udar instrumentu ne’ebé sufisiente atu halo festa demokrasia ho di’ak no esperansa katak sei la’o ho di’ak.
Informa tan, ParPol sira bainhira halo alterasaun ba sira nian estatutu, obrigasaun atu komunika ba TR.
Jornalista: Julia Chatarina
Editora: Rita Almeida
