DILI, (TATOLI) – Ministru Edukasaun, António da Conceição ohin, sesta (5/5) akompaña bolseiru veteranu no kombatente nasionál nia oan na’in 42 ba Indonézia.
Akompañamentu ne’e hodi ko’alia ho reitór Institut Sepuluh Nopember Surabaya (ITS), Profesór Joni Hermana, husu apoiu no responsabilidade.
“Hodi bele nafatin halo akompañamentu besik liutan ho estudante sira atu bele fila ho rezultadu”, informa Ministru Edukasaun iha salaun Infordepe Balide.
Bolseiru sira ne’e sei estuda área enjeñaria iha ITS. Oportunidade dahuluk ne’e governu oferese liuhusi FDCH (Fundo do Desenvovimento da Capital Humano).
Bolsa Estudante Cabo-Verde Atraza
Entretantu, kona-ba bolseiru sira iha Cabo-Verde sira-nia bolsa hetan atrazadu, governante ne’e informa nia parte hetan ona informasaun.
“Ha’u simu ona informasaun, buka hela atu hatene katak osan ne’e haruka ona ka la’e”, dehan.
Bolsa estudu ne’e transfere fulan neen dala ida no estudante sira mak tenke kuida sira-nia osan. “Sira mak hatene sira-nia kapasidade atu jere sira-nia osan rasik. sira tenke iha kapasidade atu administra sira-nia osan rasik”, akresenta.
Nia husu atu uza osan ho didi’ak. “Notas la di’ak, rezultadu la di’ak kontratu sei hapara tanba ema barak hein oportunidade ne’e”, konklui.
Notísia relevante, klik iha ne´e: http://www.tatoli.tl/2017/04/mpie-bolseiru-52-halo-kompromisu/
Jornalista: Rafy Belo
Editora: Rita Almeida
