DILI (TATOLI) –Ministru Estadu Asuntus Sociais no Ministru Edukasaun, António Conceição ho ekipa husi FDCH ohin, Kinta (03/08) halo enkontru ho Primeiru Ministru (PM), Rui Maria de Araújo hodi aprezenta relatóriu kona-bá medida ne’ebé atu hola ba kondisaun estudante Timoroan iha Cabo-Verde.
“Investigasaun kona-bá kondisaun estudante sira, ohin lori relatóriu hodi aprezenta ba Primeiru Ministru hodi informa kona-bá medida sira mak atu hola,” Conceição tenik ba Jornalista sira hafoin halo enkontru ho PM iha Palásiu Governu.
Antonio tenik, hafoin halo apresentasaun PM fó hanoin ida ba Ministériu Edukasaun, antes haruka estudante sira fila, fó tempu uituan ba sira semana ida ka rua hodi sira bele hanoin didiak liu tan, sei atu fila ou kontinua estudu iha Cabo-Verde.
Nune’e nia informa, iha estudante nain 43 mak eskola iha Cabo-Verde mas kuandu ekipa investigasaun ba haree, estudante nain 20 de’it hakarak kontinua estudu no nain 23 hakarak atu fila mai Timor-Leste. Ho nune’e estudante nain 23 atu kontinua hela iha Cabo-Verde no nain 20 fila ona.
Aleinde de ne’e husu ba Ministru Edukasaun haruka funsionáriu ida atu ba Cabo-Verde hodi halo observasaun no akompañamentu ba estudante sira to’o fulan Dezembru nia laran hodi nune’e bele haree se estudante sira atu hakarak atu kontinua ka atu fila.
“PM nia opiniaun pesoal mak ida ne’e, tamba baze kontratu sira ba eskola iha Cabo-Verde, bainhira sira lakoi kontinua sira tenke fila lai mai Timor-Leste, hafoin tuir fila fali konkursu atu ba Portugal ka Brazil depende oportunidade ne’ebé iha,” Antonio haktuir.
Hodi subliña tan, razaun sira atu fila primeiru tamba osan atraza, ida ne’e los duni situasaun ne’ebé mak hasoru, segundu tamba tratamentu saúde iha ne’eba ladun di’ak maibé kestaun sira ne’e normal iha fatin hotu-hotu sempre akontese, terseru tamba kestaun seguransa ba sira ameasadu.
Kona-bá osan uluk atraza ulun boot Ministériu Edukasaun esplika iha fulan haat tamba halo transferensia husi BCTL direitamente ba konta estudante iha Cabo-Verde, maibé hafoin deteta problema ne’e FDCH ho ME obta atu halo transferensia direita ba embaixada Timor-Leste iha Lisboa, husi Lisboa mak transfere ba sira nia konta.
Nune’e mós termus asistensia saúde, agora ME tenta atu hadia. ME tenke halo akordu ho klínika ka ospital, maibé agora tinan ida aloka US$ 500 ba tratamentu saúde ba kada estudante.
Kestaun seguransa, PM Cabo-Verde mós komprometidu atu labele foti kestaun seguransa hodi bele sakrifika kooperasaun entre Timor-Leste no Cabo-Verde, nune’e promete sei fó atensaun másimu hodi estudante sira bele hela ho seguru.
Antes ne’e, estudante Timoroan iha Cabo-Verde aprezenta sira nia petisaun ba Prezidente Repúblika (PR) no PR komunika kestaun ne’e ba PM. Tamba ne’e mak PM husu hodi ME ho ninia ekipa esklarese hodi informa fali rezultadu ba PR.
(Jornalista: Julia Chatarina)
(Editór : Manuel Pinto)
