DILI, (TATOLI) – Prezidente Women Entrepreneurship Organization Day (WEDO), Khatleen Gonçalves, hatete dezafiu boot ne’ebé feto-maluk hasoru mak jestaun ba negósiu, lori produtu bá merkadu no asesu ba finanseiru ne’ebé sai kestaun ba sira iha vida emprezariál nian.
Nune’e liuhusi Díli Meracdo de Noite ne’ebé organiza to’o tempu ne’ebé ladetermina sei kapasita feto emprezária sira atu sai ema negosiante loloos para ladepende ba projetu no sé de’it, nune’e bele kria serbisu ba sira-nia aan no liuliu bainhira iha rendimentu bele haree filafali oan nia eskola no uma-laran.
“Ha’u fiar metin ida ne’e ba maluk feto sira tanba sira dalabarak jere sira-nia osan ho kuidadu, iha kompromisu no onestidade. Sira ne’e mak negósiu nia fundamentál”, Khatleen hatete iha Akait, ohin.
Liuhusi merkadu kalan ne’ebé partisipa husi vendedora hamutuk 21 iha grupu dahuluk husi ema barak ne’ebé rejista hamutuk 40 resin ne’e, aleinde fa’an produtu iha área Akait nian, partisipa mós treinamentu jestaun negósiu (on the job training) nian no bainhira to’o tempu ona atu sira bele hakat tama ona bá merkadu, iha ona koñesimentu no ema komesa hatene ona sira-nia empreza maka espera sira bele bá fali sira-nia fatin ka munisípiu hodi loke negósiu antes ne’ebé iha no sei fó fali espasu ne’e ba feto maluk seluk atu hetan fali oportunidade hanesan hodi halo negósiu no hetan mós kursu ne’e.
“Ami mós fó treinamentu balun ba sira para hala’o jestaun negósiu oinsá. Iha sesaun hira ha’u rasik mak fó ba sira nomós sai obrigatóriu ba empreza sira iha mercado de noite ne’e atu hakerek osan hira mak lori mai investe iha Díli Mercado de Noite, hodi bá sosa saida ona, ohin fa’an ona hira no despeza halo ona hira, cash flow hira, sira ne’e ami treinu ona iha fatin atu prepara sira sai negosiante ida loloos no independente”.
Liuhusi atividade feira ne’e, treinu kedan vendedora sira ne’e ho maneira prátika no efisiénsia atubele aprende ho di’ak no envolve diretamente.
“Ha’u akompaña hela no espera katak loron ida sira sei sai ema ida hetene jere sira-nia negósiu, hatene merkadu, kompetisaun no hatene serve sira-nia kliente no iha responsabilidade”.
Agusta Antónia Gomesa, Vededora iha Akait hatete prioridade feira ne’e fó liu oportunidade ba feto, nune’e organiza hamutuk hodi dezenvolve produtu lokál ne’ebé mai ho hahán lahanesan, iha mós asesória no produtu seluk tan.
“Kona-ba ami-nia lukru loroloron nian, ami la prepara finanseira boot, dalabarak ami mai ho baze livru ida naran kontabilidade (pembukuan iha lia-indonézia) kada ema ida, entaun kada vés ami mai loron ida ho osan dólar 20 ou laiha liu dólar lima ami bele halo ona, entaun rendimentu ba ami kalan ida dalaruma bele hetan dólar 40, 50”.
Nu’udar feto ne’ebé hamahan iha organizasaun ne’e enkoraja maluk seluk no husu ba ministériu balun atubele mós fó espasu luan hanesan Merkadu Lama atu dada emprezária seluk ne’ebé hakarak halo atividade ne’e hodi halo kompetisaun ba produtu lokál aleinde iha Akait bele mós iha fatin seluk hanesan iha Timor Plaza nune’e kompete iha merkadu lokál nian.
Jornalista: Maria Auxiliadora
Editora: Rita Almeida
