DILI, (TATOLI) – Organizasaun Rede Feto Timor-Leste iha meadu fulan ne’e sei hala’o konferénsia munisipál hodi envolve feto hosi munisípiu 12 inklui Rejiaun Autónomu Espesiál Ambenu Oekusi (RAEOA) ne’ebé sei hala’o iha munisípiu Baukau.
Prezidente Fundasaun Patría, Laura Pina, hateten konferénsia ne’e sei diskute kona-ba vizaun feto ba dezenvolvimentu nasionál.
ʺAtividade ida seluk maka konsertu muzika hodi re-lansa fila fali kampaña sen porsentu ha’u prontu atu partisipa iha dezenvolvimentu nasionál, sen porsentu atu kontribui ba pás no estabilidade no prontu atu kontra korupsaunʺ, dehan eis Sekretária Estadu ba Igualdade Jeneru iha governasaun dahituk hafoin hasoru malu ho Sekrétariu Estadu Komunikasaun Sosiál, Merício Juvinal dos Reis Akara, iha Palásiu Governu, ohin.
Konsertu muzika nu’udar parte ida hodi mobiliza sosiadade tomak atu fó kontribuisaun ba dezenvolvimentu nasionál.
Eis Governante haktuir presiza apoiu SEKOMS hodi organiza mídia hodi halo kobertura ba atividade refere.
ʺAmi nia kooperasaun ho SEKOMS maka atu envolve ho masimu maluk mídia sira iha konferénsia munisipál feto Timor-Leste hodi halo kobertura ba feto hosi munisípiu, suku no aldeia sira nia lian ba dezenvolvimentu nasionálʺ.
Sekrétariu Estadu Komunikasaun Sosial, Mericio Juvinal dos Reis Akara, hateten governu prontu atu servisu hamutuk ho organizasaun feto sira hodi transmite informasaun kona-ba partisipaun feto iha dezenvolvimentu.
Akara simu idea hosi organizasaun feto sira atu fó formasaun ba jornalista sira kona-ba balansu igualdade jeneru iha públikasaun informasaun.
ʺSEKOMS konkorda sei halo formasaun ba jornalista sira, tanba ne’e rede feto sira mós bele sai ekipa formadór ba jornalista siraʺ, realsa.
Jornalista: Agapito dos Santos
Editora: Rita Almeida
